Ni Rey Pasaporte
PIO Reporter
CEBU CITY (Sept. 27, 2022) — Sa pagpahibawo ni Mayor Mike Rama nga pirmahan niya ang executive order sa “Oplan Disiplina” karong semanaha alang sa hugot nga pagdisiplina sa mga tawo atol sa flag-raising ceremony niadtong Lunes, unsay nahimong reaksyon sa pipila ka mga kawani sa City Hall sa mga gipamulong sa mayor?
Basura…proper disposure of garbage. Mao gyud nay nakita nako, nga way disiplina ang uban, kay magpataka og labay sa basura diha sa gawas, kaonon sa iro. Dapat tarungon og dispose, isud og sako ang basura, unya higtan og tarong o kaha di lang una ibutang sa gawas ang basura anha lang usa sud sa ilaha unya na ipagawas kun na’nay mokolekta. — Resty Mendoza, City Protocol Office.
Kita mismo manglimpyo, disiplinahon nato atong kaugalingon. Kay makita nimo sa uban, pataka nalang og labay sa basura, human ang basolon ang gobiyerno kung magbaha. — Hazel Lauron, City Health Department.
Sa CESET, manakop sila manigarilyo sa public, kay pagdisiplina na sa mga tawo; unya kanang basura. Kay naay mga turista moanhi dinhi, at least presentable sa kalimpyo atong siyudad. — Harvey Palomar, Vaccination Operation Center.
Pagpanglimpyo gyud sa atong balay. Kung unsa ta sa atoa, mao sad sa atong trabahoan. — Rodrica Pantoñal, City Hospitalization and Medicine Program.
Ari ta magsugod sa atong balay. Dili ta magpataka og labay sa atong basura. Ang Singapore gud known man siya nga limpyo nga country. Mao nay sundon nato para ma-attain nato unsay gusto natong makab-ot. — Ryan Macion, Department of Public Services.
Di magpataka’g labay sa basura. Disiplina sa atong kaugalingon. Kani atong kinaiya dili mao, kay naay uban tag-iya’g sakyanan bisa’g kita sa signage nga “no parking”, bisa’g na ana, di gihapon sundon. Unya sila maoy naka-violate, ang CCTO himoong ngil-ad. — Madelene Pacanza, Cebu City Transportation Office (CCTO).
Kani sa bike lane ng kuwang nalang ani ang policy unsaon nato pagtudlo sa naggamit og bisiklita, unsa ang maayong pamaagi. Siyempre ato silang i-guide sa husto nga agianan. Kinahanglan motuman sila sa saktong agianan, kay naay uban mosukwahi sila ba. Bisan na’nay bike lane di sila (mosunod). — Nelson Lim, Management Information and Control System.
Tinuod ang disiplina magsugod gyud sa panimalay. Like sa among program, focus namo sa panimalay man para sa pamilya. Behavior change, mao nay pinakalisud nga challenge for us…i-usab ng behavior sa usa ka tawo. Ang programa nga akong gihuptan mahitungod man sa pag-edukar sa mga ginikanan. — Emma Seville, Cebu City Nutrition Office.
Part sad sa among side, among adbokasiya dili gyud mohatag sa mga tawo naa sa dan, ang dili pagpanghatag sa dalan ilabina karon hapit na ang Disyembre. Generosity nila ibutang nila sa tamang lugar. Ayaw sa dan kay kung anha sa dan mo-create man siya og chaos. Gladys Vaño, Cebu City Anti Mendicancy Office. #
Cebu City • News & Information 