Ni Rey Pasaporte
PIO Reporter

PLAZA INDEPENDENCIA, Cebu City (Hunyo 14, 2022) — Natagamtaman karong adlawa sa mga batang libud-suroy niining dakbayan ang lami nga pagkaon human gipakaon ug gilingaw sila isip kabahin sa pagsaulog sa adlaw nga natawhan sa anak ni Mayor Mike Rama nga si Michael Jude o MJ.

Ang Barangay Affairs Office (BAO) ug ang Protocol Office maoy nipahigayon sa “birthday party” nga gipatambongan sa mga batang libod-suroy tungod kay gahapong adlawa maoy ikaduha ka tuig nga kasumaran sa adlaw nga natawhan ni MJ.

Si MJ anak ni Mayor Rama ug Malou Mandanat Rama.

Malipayon ug sadya ang birthday party sa anak ni Mayor Mike Rama nga si MJ sa Plaza Independencia tungod kay daghan ang mga bata. (PIO/Allan Defensor)

Lakip sa didto si  Bise Mayor Dondon Hontiveros kinsa maoy usa sa mga ninong ni MJr. Didto sab si Portia Basmayor, ang labaw sa Department of Social Welfare and Services,

Kapin usa ka gatos ka mga bata ang giimbitar sa panagtapok nga gitawag nga “Cocomelon Party”.

Human gipakaon, gilingaw sab ang mga bata pinaagi sa magic nga pasundayag. Ug gihatagan pa gyud ang tagsataga og gasa nga madala sa ilang pagpauli.

Nangunay sab og pagpanghatag og pagkaon ang asawa ni Mayor Rama nga si Malou ug ang ilang anak nga si MJ. (PIO/Allan Defensor)

“Salamat kaayo ninyo nga nangari mo diri. Ako ning gibuhat para ninyo. Amo ning gibuhat para ninyong mga bata, apil tang tanan,” pulong ni Malou.

Gipasalamatan sab niya ang mga tawo nga nagpasiugda sa kalihokan.

Matud niya, usa ka “miracle baby” si MJ alang kanila sa mayor maong ila sab nga gipaambit sa mga bata ang ilang mga grasya nga nadawat.”

“Mao ni, mo-share mi sa among blessings ninyong mga bata nga naa sa kadanan nagpuyo,” ingon ni Malou. #

Mga bata ug ginikanan nga misalmot sa pagsaulog sa adlaw nga natawhan sa anak ni Mayor Rama nga MJ. (PIO/Allan Defensor)