Dugang Meralco linemen maabot

CITY HALL, Cebu City (Jan. 10, 2022) — Aron mas mapadali ang hingpit nga pagbalik sa kuryente sa dakbayan sa Sugbo, dugang 50 ka mga linemen ang gipadala dinhi sa Manila Electric Company (Meralco).

Kini ang gibutyag ni Mayor Mike Rama atol sa flag-raising ceremony sa City Hall karong buntaga human niya nakaistorya ang mismong tag-iya nga si business tycoon Manny V. Pangilinan pagka-Sabado.

“I had a talk by phone with MVP, Manny Velez Pangilinan, and he will always be helping us. Nagpada na gali, magsugod na. Nagpuno sa Meralco og 50 kabuok linemen, plus heavy equipment for Cebu City, aron ma fast-track , aron ma-energize,” pulong sa mayor.

(Nagkaistorya mi pinaagi sa telepono ni MVP, Manny V. Pangilinan, ug kanunay gyud siyang motabang kanato.  Nagpada na gali, magsugod na. Nagpuno sa Meralco og 50 kabuok linemen ug heavy equipment alang sa Dakbayan sa Sugbo aron mapaspasan.)

Gikatakdang mangabot karong adlawa ang dugang nga mga linemen uban sa ilang mga dagkong ekipo, ug moabag gilayon sa Visayan Electric Co. (VECO) kansang pangulo, Eng’r. Raul V. Lucero, misaad nga masuga-an na ang tibook dakbayan sa gapos ni’ng bulana.

READ: VECO assures Rama full restoration by month’s end

“Hopefully, before the end of the January, tanan, ma-bukid, ma-ubos, dapat naa nay electricity,” dugang ni Mayor Rama.

(Gilauman nga ang tanan, anaa man nagpuyo sa bukirang bahin o dinhi sa ubos, kinahanglan naa nay kuryente sa dili pa mahuman ang Enero.)

“Hopefully, before the end of January, tanan, ma-bukid, ma-ubos, dapat naa nay electricity.”

Mayor Mike Rama, human madawat ang pasalig sa dugang linemen.

Daghan mga linemen gikan sa lainlaing bahin sa nasud ang ania karon sa Sugbo aron pagtabang sa pagpahiuli sa mga linya sa kuryente, dili lang sa dakbayan sa Sugbo lakip na sab sa kasilinganang mga lungsod ug dakbayan nga nahiagom sa kapintas sa bagyong Odette. (PIO/NJY)