CEBU CITY (Peb. 21, 2024) –Nimando karong adlawa si Mayor Mike Rama nga ang tanang nagpadayon nga mga pagtrabaho sa dalan nga makabalda sa dagan sa trapiko nga kinahanglang panangtangon ug buhaton sa gabii.
Nangayo sab siya og pasaylo sa publiko tungod sa nahitabong kadugay sa pagkuha sa naaberya nga truck sa South Road Properties (SRP) nga niresulta sa grabe nga pagkalangay sa mga motorista kagahapon, Peb. 20, 2024.
“What happened at the SRP? I am sorry. Secondly, that ought not to happen again,” pulong ni Mayor Rama atol sa usa ka press conference nga iyang gipatawag aron hisgotan ang nahitabo.
“One o’ clock (a.m.) na-address 9 a.m? That is unacceptable,” iyang gipuno.
Kahinumdoman nga ang trailer truck, nga may kargang container van, nitiurok tungatunga sa dalan dapit sa may viaduct sa SRP, nga niresulta sa taas kaayo nga lumbay sa natanggong nga mga sakyanan nga pulong pa niabot sa may Talisay City Fish Port.
Atol sa mao gihapon nga press conference, nipadayag si Mayor Rama nga iyang tagboon ang hingtungdang mga buhatan aron matuki ang panghitabo.
“This matter should be addressed,” ingon niya.
Buhaton sa gabii
Sa laing bahin, nimando ang mayor nga bisan unsang mga pagtrabaho sa dalan, sama sa mga pagkawot sa Metro Cebu Water District aron pag-ayo og linya sa tubig, kinahanglang buhaton sa gabii.
“Any civil work that can cause tremendous traffic challenge should be done in the evening,” ingon niya.
“I want all obstructions removed and put steel plates (over the diggings so cars could pass over them),” dugang ni Mayor Rama.
Pulong niya, ang pagtrabaho, sama sa mga pagkabkab sa MCWD sa mga dalan, angay buhaton sa alas 10 sa gabii hangtud alas-kwatro sa buntag aron malikayan ang pagkatanggong sa mga sakyanan.
“If they will not follow, we will take over. And mobayad sila namo kay kami na may motrabaho,” ingon ni Mayor Rama. | PIO / rhm
Cebu City • News & Information 