CEBU CITY (Peb. 21, 2024) –Subling gipadayag ni Mayor Mike Rama karong adlawa ang iyang pagtambong sa ipahigayong “prayer rally” karong Dominggo, Peb. 25, 2024.
Atol kini sa iyang pagpamulong sa Central Visayas Public Financial Management Competency Program nga gipahigayon diha sa Bai Hotel sa dakbayan sa Mandaue.
Kini human sab nga nipasalig ang mga nagpaluyo sa prayer rally nga dili himuon ang okasyon nga paagi sa pagpangaway ug paghisgot og mga isyu nga makabahinbahin sa atong nasud.
Ang prayer rally, nga gitumong aron pagsaulog sa kasumaran sa EDSA People Power, giingong tambongan sab ni kanhi presidente Rodrigo Duterte, nga bag-o lang nibuhi og sakit nga mga pulong batok kang Presidente Ferdinand “Bongbong” Marcos, Jr.
Si Mayor Rama daan nang nakapadayag nga wala siyay dapigan sa maong panagsungi, nga pulong pa niya mobuakbuak ra sa nasud.
“Lipay na man ko kay giklaro na man nila (sa organizers). They can expect me to be there,” pulong ni Mayor Rama atol sa sa usa ka press conference kaganihang udto.
Panagtapok sa mga treasurer, budget officer
Ang kalihokan sa Bai Hotel gitambongan sa mga treasurer ug mga budget officer sa lainlaing lokal nga pangagamhanan sa mga probinsiya sa Sugbo, Bohol, Negros Oriental, ug Siquijor nga mga sakop sa Association of Local Budget Officers (ALBO).
Human sa pagpamulong ni Mayor Rama, nisunod usab gilayon si Budget Secretary Amina Pangandaman, nga naghisgot kabahi sa nasudnong budget alang karong tuiga.
Pulong ni Pangandaman, usa ka trilyon ka pesos ang sa maong budget ang alang sa “tourism-related” nga mga proyekto nga ipatuman sa Central Visayas.
Nahugyaw sab ang mga treasurer ug mga budget officer atol sa pagpamulong sa mayor dihang gidalitan sila niya og duha ka mga kanta. | PIO / em
Cebu City • News & Information 