CEBU CITY (Peb. 10, 2024) –Nipadayag si Mayor Mike Rama sa iyang panghinaot nga unta dili mabahinbahin ang Pilipinas, nga magpabilin kining usa ka nasud nga kapupud-an.
Gisulti niya kini atol sa iyang pagpamulong isip pinasidunggang dinapit sa ika-18 nga Shari’ah Training Seminar Commencement nga gipahigayon sa One Central Hotel sa may dalan Sanciangko, dakbayan sa Sugbo.
Nagpasalamat usab siya sa suporta sa kaigsoonan natong mga Muslim dinhi sa dakbayan ngadto sa iyang administrasyon.
“Kon servant ka always look at your fellowmen, fellow Muslim brothers and sisters, fellow Filipinos. I don’t want Luzon, Visayas, and Mindanao separated. I only would want one Philippine archipelago,” matud pa ni Mayor Rama.
Gilunsad karun ni kanhi Presidente Rodrigo Duterte ug ni kanhi House Speaker ug karun Congressman Pantaleon Alvarez ang Mindanao Initiative, usa ka lakang padulong sa pagbuwag sa Mindanao gikan sa Pilipinas.
Pagbansay-bansay
Ang okasyon kabahin sa lukop nasud nga Shari’ah Law Training, nga gisugdan Nobiyembre sa niaging tuig hain ang alang sa Kabisay-an dinhi gipahigayon sa dakbayan sa Sugbo.
Sa 52 nga mga nakahuman sa training ug nitapos karong adlawa, 35 niini mga babaye samtang 17 ang mga lalaki.
Mandatory o kinahanglan gyud nga pasaron kining maong training alang sa mokuha sa Shari’ah Bar Examination nga gikatakda karong Peb. 24 hangtud sa 28.
Ang pagtapos sa 52 ka mga nilampos sa training gipamatud-an sa pamuno sa Cultural Affairs Division sa National Commission of Muslim Filipinos sa Kabisay-an nga si Ms. Minang M. Manggis. | PIO / em
Cebu City • News & Information 