CEBU CITY (Peb. 5, 2024) – “Dili nato yamayamaan ang Konstitusyon.”

Mayor Mike Rama. | 📷 File

Mao ni ang subling giingon ni Mayor Mike Rama kaganihang buntag atol sa flag ceremony sa City Hall kabahin sa panawagan nga usbon ang batakang balaod sa nasud pinaagi sa usa ka People’s Initiative (PI).

Daan nang nisulti ang mayor nga samtang moduyog siya sa panawagan pag-usab sa Konstitusyon, angay kining buhaton pinaagi sa “Constitutional Convention” (ConCon).

Sa PI, mopadala sa ilang mga pirma sa Commission on Elections ang tres porsiyento sa mga botante sa usa ka distrito isip petisyon nga suportado nila ang pag-usab sa Konstitusyon pinaagi sa Kongreso, samtang ang ConCon mao ang paghingalan og mga delegado nga magtapok aron hulmahon ang mga kausaban alang sa Konstitusyon.

“Sa baroganan, mobarog man gyud ko ba, nga dili nato yamayamaan ang Batakang Balaod. Clear ko ana. Naay mga proseso, klaro kaayo,” pulong ni Mayor Rama atol sa flag-raising ceremony kaganihang buntag.

Wala nasayod

Former President Rodrigo Duterte talks to Mayor Mike Rama. | 📷 File

Ingon niya, wala gani siya masayod nga adunay PI kay walay niduol kaniya kabahin niini ug sa iyang nahibaw-an, lakip sab sa Konseho sa dakbayan.

Alang ni Mayor Rama, dili kabubut-on sa mga tawo ang PI kundili sa mga kongresista lang.

“Wa gyuy nangabot nako nga istorya nga naa diay People’s Initiative. And I am the mayor, and we have the (City) Council. I do not know kung nabaot ba sa konseho, wala gyud na kaabot nako, kanang People’s Initiative, nga gihinganlan nako nga ‘Congressional Initiative’,” sulti niya.

“Wala moy kalibotan anang PI. Si Digong pa ana, kahibalo mo unsay meaning anang PI? Get my point?” dugang sa mayor.

(Nailhan si kanhi presidente Rodrigo “Digong” Duterte sa pagpamalikas gamit ang “PI”.)

Mayor Mike Rama and President Ferdinand “Bongbong” R. Marcos, Jr. affirm in a simple gesture their unity and solidarity for Cebu City and the country when both met over dinner in Pasay City on June 7. | 📷 Photo from Mayor Mike’s FB Page

Daan nang gisulti ni Mayor Rama nga mas gusto niya ang ConCon, sama sa gihimo aron pandayon ang 1935 Constitution, kay mas may kaalam ug hanas sa balaod ang magtapok aron sabotan ang mga angay usbon sa atong Konstitusyon.

Bisan pa man gani niini, nipahimangno siya batok sa dili na unya mabakwi nga sangpotanan kung sa pag-usab sa Konstitusyon mosulod ang pamulitika.

“We also need to be careful of tinkering with the Constitution, as we might be opening a Pandora’s Box, which will also lead to personal interests, whims, and caprices,” pulong niya atol sa usa ka pakighisgot niadtong Enero 11.

Nabalaka

Kabahin kang kanhi presidente Duterte, nisulti sab si Mayor Rama nga samtang dili unta angay nga makakita ang mga Sugboanon nga makigbinayloay kini og dili maayong mga pulong kang Presidente Ferdinand “Bongbong” Marcos, Jr., dili maayo nga mointra pa siya niini.

“Asa man mo kakita, former president, incumbent president naglinabayay og dili maayo nga mga istorya. Angay ba na nato? Do we deserve it? Of course, we don’t deserve it!” ingon ni Mayor Rama.

“Kahibalo man mo sa akong stand sa panghitabo niining atong nasud. Dili ta mag-apil-apil to add fuel to fire,” dugang niya. | PIO / rhm

Rama favors Charter Change through convention
Away ni Duterte, Presidente Marcos gikaguol ni Mayor Rama