By Nova Jane Yanson
Staff Reporter
CEBU CITY (Peb. 5, 2024) – Pasakaan og kaso ni Mayor Mike Rama kadtong tawo o’ mga tawo nga nagpakatag og sayop nga istorya nga siya ug ang iyang convoy maoy ni-hit and run sa usa ka batan-on duol sa Redemptorist Church ning dakbayan sa Sugbo niadtong Domingo, Peb. 4.
Gipahinumdoman sab sa City Hall ang kapulisan nga buhaton ang trabaho niini og ilhon kinsa gyud ang nakaligis sa 23 anyos nga biktima nga si Jeslar Uriel Larumbe.
Gikaistorya karong adlawa ni City administrator Collin Rosell si Col. Janette Rafter, ang deputy director sa Cebu City Police Office, ug gitahasan nga motino sa hitabo ug ilhon kinsa gyud ang sakyanan nga nakaingon sa kamatayon sa biktima.
“Identify kung kinsa ang parties nga involved,” pulong ni Atty. Rosell sa iyang pagpatawag kang Rafter.
Hangyo
Atol sa flag-raising ceremony kaganihang buntag, Peb. 5, 2024, gisulti ni Mayor Rama ang iyang kahingangha nganong nalabot siya sa panghitabo.
“Kinsa nang boanga…ako nang ipakiha sa akong anak. And do not stop looking for that person. File a case against them,” nagkanayon ang mayor ngadto sa iyang anak nga si Atty. Mikel Rama, nga diha pag flag-raising ceremony.
Hangyo sa mayor ngadto sa iyang anak, “Dong, please take the cudgel. Do not allow your father desecrated, not being protected…. Mikel, defend me as I defended Don Vicente Rama when he was being hit and history was being changed.”
Si Don Vicente Rama apohan ni Mayor Rama maoy nangamahan sa balaod nga naghimong chartered city sa Sugbo.
Kahinumdoman nga sakay sa iyang motorsiklo si Larumbe, kanhi varsity player sa Don Bosco Technology Center-Cebu ug usa ka Civil Engineering graduate sa Cebu Institute of Technology-University dihang gidumbolan og gibiyaang patay sa usa ka sakyanan nga nagsunod kaniya sa may Redemptorist Church.
Gikataho nga ang maong sakyanan nag-blinkers pa.
Human sa hitabo, aduna dayoy nanggawas nga mga istorya nga “convoy” ni Mayor Rama ang responsable sa insidente.
Toa sa Bohol
Ang nanggawas nga balita gihimakak sa mayor kay lagi didto siya sa Bohol atol sa pagkahitabo.
“Ako pay nakaligis. Haskang lawgawa ning kalakiha. Unya ang akong nawong nakit-an pa gyud (kuno). Haskang tuytoya. Ngano man ni? Ing-ani nalang gyud ka demonyo ang nagpalibot dinhi sa siyudad?” tuaw sa mayor.
“Wa gani koy kalibotan (sa hitabo). Tua ko sa Bohol, ako na nuon ang nakaligis, gibiyaan sa akong sakyanan, nakit-an ang nawong ni Mike Rama. Yawa pahawa! Yes, yawa na (nga tawo). Tua ko sa Bohol,” dugang niini.
Sumala ni Atty. Rosell, mahinungdanon nga mailhan sa kapulisan kinsa ang nakasala sa batan-on.
“Real victims gyud ni sila…. It was an utmost disregard of the law. Serious kaayo ni siya,” pulong niya. | PIO / njy
Cebu City • News & Information 