CEBU CITY (Enero 16, 2024) – Sugod karong Peb. 1, 2024, ang buhatan sa Office of the Building Office (OBO) sa dakbayan sa Sugbo modawat lang og transaksyon pinaagi sa online.
Kini nagpasabot nga bisan kinsa makatransaksyon sa OBO nga dili na kinahanglang mopakita sa linawas nga paagi sa maong buhatan.
Pulong ni Architect Florante Catalan, labaw sa OBO, gituyo kini aron pagwagtang sa kalangay ug subay sab sa gitinguha nga “ease of doing business”, o paghatag og kasayon sa pamatigayon dinhi sa dakbayan.
Kini kabahin sa pasalig ni Mayor Mike Rama nga himoong yano og sayon ang proseso sa pagnegosyo.
“In line with our commitment to the ARTA Ease of Doing Business, No Contact Policy, and No Gift Policy, OBO-Cebu City shall only accommodate/accept transactions made online,” saysay sa usa ka bahin sa pahibawo sa OBO.
Human nga nahapsay na ang ilang sistema, nipahibawo ang OBO nga ang mga aplikasyon sa building permit, certificate of occupancy/use, stand-alone mechanical permit (permit to install/operate), ug uban pa pwede nang himoon sa opisyal nga website sa OBO, ang 𝐨𝐛𝐨.𝐜𝐞𝐛𝐮𝐜𝐢𝐭𝐲.𝐠𝐨𝐯.𝐩𝐡.
Alang sa ubang mga aplikasyon ug mga mulo ug mga pangutana, sertipikasyon, ug mga komunikasyon, mahimong mo-email sa obo sa address nga 𝐨𝐛𝐨𝐜𝐚𝐭𝟐𝟎𝟐𝟑@𝐜𝐞𝐛𝐮𝐜𝐢𝐭𝐲.𝐠𝐨𝐯.𝐩𝐡.
Kung may masugatang mga kakulian sa proseso samtang nagduso og aplikasyon sa online, mahimo sab nga motawag sa OBO sa mga numero (032) 256-2623 o sa (032) 253-2026. | PIO / rm
Cebu City • News & Information 