Report ni Reynato Pasaporte

Gihatagan og ayuda sa Department of Social Welfare Services (DSWS) ang 39 ka pamilya nga maapektuhan sa demolition nga gikatakda karong Marso 30.

Si Portia Basmayor, Operation Head sa DSWS, nagkanayon nga gihatagan nila ug tag 25 ka kilo sa bugas humay ug assorted canned goods ang 39 ka pamilya sa barangay Kasambagan, siyudad sa Sugbo.

Matud ni Basmayor, ang apektadong mga pamilya nag-abang lamang og balay hain ang mga tag-iya niini naghinay-hinay na sa pagguba sa istraktura. Ang luna gipanag-iya sa usa ka pribadong indibidwal.

Ang Department for the Welfare of the Urban Poor (DWUP) maoy nagpahigayon og profiling sa 39 ka pamilya diin giduso ang listahan ngadto sa DSWS. Matud ni Basmayor ang DSWS maoy incharge sa mga ayuda nga naglakip sa apektado sa demolisyon sanglit tipik kini sa ilang relief and recovery disaster preparedness nga ang budget niini kuhaon sa disaster funds.