Ni Rey Pasaporte
Staff Member

CEBU CITY (Pebrero 25, 2023) — Sa unang higayon sa kasaysayan sa Freedom Park, gipahigayon dinhi ang pagtamod sa EDSA People’s Power, nga anaa na sa ika-37 ka tuig karon.

Gipahigayon ang seremonyas sa paghalad og buwak nila ni Mayor Mike Rama ug Bise Mayor Raymond Alvin N. Garcia sa obelisk sa bag-ong gipahiuli nga Freedom Park atbang sa main campus sa University of San Jose-Recoletos sayo karong adlawa.

Alang kang Mayor Mike Rama, haom kaayo nga sa Freedom Park gisaulog sa dakbayan ang ika-37 ka tuig nga kasumaran sa EDA People Power. (PIO/Allan Cuizon)

Ang kanhi tindahanan og buwak nga bahin sa Carbon Public Market nahiuli sa iyang kanhi dagway ug gibuksan niadtong Oktubre 28, 2022.

Kaniadto, panahon sa mga Amerikano ug sa wala pa kini mamahimong baligyaan sa mga nagkadaiyang produkto, ang “Freedom Park” lugar hain mahimong maghimo og pulitikanhong panagtapok ug paghimo og rally aron pagpadayag sa pagsupak o pag-uyon kabahin sa mga lagda sa gobiyerno.

Ang dagway sa Freedom Park sa wala pa gini gibungkag aron ipahiuli ang kanhi dagway niini. (PIO/Allan Cuizon)

Apan kay lagi duol sa merkado sa Carbon, inanay nga nanaghan ang mga naninda libot niini, hangtud nga nasunog ang Unit II sa Carbon Public Market niadtong tuig 1998 ug sa Freedom Park gipahikling ang mga manindahay.

Sa pagsugod sa proyekto sa paghimong moderno sa Carbon Public Market, gisiguro ni Mayor Rama nga mahibalik kin isa iyang karaang dagway, nga mao ang usa ka suroyanan sa mga tawo.

Kaganihang buntag, Si Mayor Mike Rama ug Bise Mayor Raymond Alvin Garcia maoy nangulo sa kalihokan isip paghandom sa Edsa People Power, nga maoy labing una sa kasaysayan sa dakbayan nga dinhi gipahigayon sa Freedom Park.

Mipahinumdom si Bise Mayor Raymond Alvin N. Garcia, labaw sa Cebu City Cultural and Historical Affairs Commission, sa kamahinungdanon sa pagbalik-lantaw sa nangaging mga panghitabo. (PIO/Allan Cuizon)

“This is a venue were naa gali mga kawsa, naa gali mga ginganlan nato og problemang nasyonal, problemang lokal, mag-abot dinhi. Political convergence dinhi. Mao na ako, I’m a man of yesterday,” ingon ni Mayor Rama.

Sa iyang bahin, nipahinumdom si Bise Mayor Garcia, nga maoy labaw sa Cultural and Historical Affairs Commission sa dakbayan, nga dili kalimtan kung unsay mga nangagi o ang nilabay nga panhon.

Lakip sa mga miduyog sa kalihokan ang mga konsehal sa dakbayan nga sila si Dondon Hontiveros ug Francis Esparis. (PIO/Allan Cuizon)

“Niingon si Pearl S. Buck, ‘If you want to understand today you have to search yesterday’.  That is why…it is important to remember and commemorate such EDSA People Power…, regardless of your political affiliation, political inclination, political color. One cannot deny the significance of the EDSA People Power Revolution has in our country,” ingon niya.

Gihisgotan niya og balik unsa nga dili parehas sa ubang mga nasud nga niagi pa ug kapintas ug ug kagubot ang pagkab-ot sa kausaban, nakab-ot kini sa nasud nga walay gibuhis nga dugo.

Niingon si Pearl S. Buck, ‘If you want to understand today you have to search yesterday’.  That is why…it is important to remember and commemorate such EDSA People Power…, regardless of your political affiliation, political inclination, political color. One cannot deny the significance of the EDSA People Power Revolution has in our country.

Bise Mayor Raymond Alvin N. Garcia

“EDSA is the best demonstration of the awesome power of the people, or of Vox Populi, otherwise known as ‘The Voice of the People’,” ingon sa bise mayor.

Gawas kaniya ug ni Mayor Rama, nitambong sab si City Administrator Suzanne Ardosa, mga konsehal sa dakbayan nga sila si Dondon Hontiveros ug Francis Esparis, ug mga kawani sa City Hall. #