Ni Nova Jane Yanson
Staff Member
CEBU CITY (Pebrero 24, 2023) — Dili paglimot sa kagahapon.
Mao kini ang gipaghimug-atan ni Mayor Michael Rama ug Bise Mayor Raymond Alvin N. Garcia sa ilang pagpamulong atol sa sa pagsaulog sa ika-86 ka tuig nga kasumaran sa Charter Day sa dakbayan karong adlawa.

“Importante kaayo nga di nato kalimtan ang atong kagahapon…. Ngano si Don Vicente Rama February 24 ang pirmeng gibalikbalik? Nganong di man kuno ibalikbalik? Lalim ba mo, dili sayon ang pagkasiyudad, mao gyud na inyong hinumduman,” pulong sa mayor.
Iyang giaghat ang tanan nga mas ilhon ang kinabuhi sa iyang apohan.
Importante kaayo nga di nato kalimtan ang atong kagahapon…. Ngano si Don Vicente Rama February 24 ang pirmeng gibalikbalik? Nganong di man kuno ibalikbalik? Lalim ba mo, dili sayon ang pagkasiyudad, mao gyud na inyong hinumduman.
Mayor Mike Rama
“Tagai ninyo og panahon, basaha ang mga sinulat, pagkanindota ni Don Vicente Rama. Mao na kaming mga Rama proud gyud kaayo. Pirme nakong gibalikbalik kana,” dugang niya.
Isip kabahin sa pagsaulog sa Charter Day sa siyudad, usa ka seremonyas sa paghalad og buwak sa rebulto ni Don Vicente Rama, ang amahan sa Cebu City Charter, ang gipahigayon karong buntag.

Gipangulohan ang kalihokan ni Mayor Rama, Bise Mayor Garcia, ug sa banay nga Rama.
Sa iya sab nga pagpamulong, nisulti ang bise mayor nga dili makumpleto ang kasaulogan kung dili hisgotan si Don Vicente Rama, kay kini man ang pagpanday sa balaodnon nga naghimong dakbayan sa Sugbo.

“Remembering our origin and our history as a city is ever more vital as we continue to move forward and lead the race towards a Singapore-like Cebu City,” nagkanayon siya.
“As they say, you can’t really know where you’re going until you know where you have been,” dugang niya.
Ang kalihokan gitambungan sa pipila ka mga konsehal sa dakbayan, mga labaw sa mga departamento ug mga kawani sa City Hall. #


















































