Ni Rey Pasaporte
Staff Member
CEBU CITY (Pebrero 23, 2023) — Upat ka dagkong proyekto sa lokal nga pangagamhanan sa dakbayan ubos sa administrasyon ni Mayor Mike Rama ug Bise Mayor Raymond Alvin Garcia ang gi-turn over sa tulo ka mga barangay karong adlawa.
Sa barangay San Jose, nangunay sa pag-turn over si Mayor Rama sa upat ka andanang eskuylahan nga may 16 ka mga lawak.
Kauban sab sa mayor ug sa bise mayor ang mga konsehal sa dakbayan nga sila si Jerry Guardo, Francis Esparis, ug Noel Wenceslao.
Sa iyang pagpamulong, gipahinumdom ni Mayor Rama ang damgo sa iyang administrasyon.
“Singapore-like Cebu City…ganahan mo dili? Dapat ganahan mo, dili man na akong vision, dili na akong panglangtaw. Sa tagsa-tagsa nato naa tay mga ginganlan nato sa Binisaya og ‘damgo’…ginganlan nato sa Binisaya mga ‘pangandoy, panglantaw’,” pulong niya.
Si Guardo, chairman sa committee on infrastructure sa konseho, niingon nga nisugyot kaniya si Mayor Rama nga kung magbuhat og koral sa eskuylahan kinahanglang patas-an kini ug adunay bahin nga isira ug koralon nalang og barbwire aron masiguro nga luwas ang mga bata.
Patamnan pud sa mayor og mga kahoy aron nindot tan-awon ang palibot sa tunghaan.
Ang kapitan sa San Jose nga si Joe Ardaba nipaabot sa dako niyang pasalamat kang Mayor Rama tungod kay natuman na gyud nga mahimoan og eskuylahan ang iyang barangay, nga maoy damgo niya kaniadto pa nga giisip niya nga maoy pinakadako nga proyekto nga iyang nahimo.
Niingon ang principal sa San Jose Elementary School nga si Marion Alvizo nga ang bag-ong school building para unta sa mga tinun-an nila sa high school apan nakita nila nga ang karaang school building nila nga naa sa Purok 4 delikado sa pagdahili sa yuta.
Ingon niya, kini ang hinungdan nganong nahukman nila nga ang mogamit sa bag-ong school building ang Kinder hangtod sa Grade 4.
Ug tungod kay naa na silay bag-ong school building, niingon si Alvizo nga sa sunod nga school year mag-abli na sila sa Grade 7 ug 8.
Sa laing bahin, moabot sab sa P7 milyones ang kantidad sa pagtrabaho ug pagpaayo sa taytayan sa San Jose hain niadto diay 1980’s pa ang maong taytayan sa panahon sa administrasyon ni Mayor Florentino Solon.
“Ang bridge nato diha ato gyud na gi-rehabilitate kay I agree dugay na na nga bridge…. Giusab gyud nato ang foundation niya, gibag-o gyud, kay medyo dili na kaayo structurally sound katong old nga design,”ingon ni Guardo.
Sa Barangay Luz, gi-turn over sab sa kagamhanan ang 700 metros ug may balor sa pagtukod nga P7 milyones ang sementadong karsada sa dalan Cabantan.
Nipasidaan si Mayor Rama sa mga opisyales sa barangay nga sigurohon nga mapatuman nga may hawan masigkakilid sa karsasa aron luwas ang paglakaw sa mga tawo, ilabi na sa mga bata.
Gimando sab niya kang Guardo, nga maoy chairman sa Technical Infrastructure Committee sa dakbayan, nga ipakuha ang nangumbitay nga mga wire sa kuryente sa lugar.
Katapusang gi-turnover sa kagamhanan ang 500 metros nga sementadong karsada sa dalan L. Flores sa Barangay Pasil nga gigastohan og P5 milyones. #
Cebu City • News & Information 