‘Balakwit’ ipa-kada-tuig sa mayor

Ni Rey Pasaporte
Staff Member

CEBU CITY (Pebrero 21, 2023) — Gisangon ni Mayor Mike Rama kang Bise Mayor Raymond Alvin N. Garcia karong adlawa ang pagsiguro nga mahitabo kada tuig ang “Balakwit”, o ang inidigay sa balak ug awit, nga gituyo isip kabahin sa pagsaulog sa ika-86 ka tuig nga kasumaran sa pagkahimong chartered city sa Sugbo.

Gusto ni Mayor Mike Rama nga sigurohon nga kada tuig na ang indigay sa balak ug awit. *(**PIO**/Allan Defensor)*

Gisulti niya kini atol sa pagpahigayon sa kalihokan sulod sa SM City Cebu hain niabot sa 20 ka mga grand finalists gikan sa 20 ka mga barangay sa dakbayan ang nagtigi.

Ang Balakwit gidumala sa Cebu City Youth and Development Council.

Pulong sa mayor, kinahanglan banhawon kada tuig ang maong indigay kay mahinungdanon nga dili makalimtan ang atong kaugalingon pinulongang Binisaya.

Si Bise Mayor Raymond Alvin N. Garcia maoy chairman sa Cebu City Cultural and Historical Affairs Commission, maong sa iyaha gisangon ni Mayor Mike Rama ang pagsiguro nga kanunay buhi ang “Balakwit”. *(**PIO**/Allan Defensor)*

Sa iyang bahin, nipadayag sa iyang pasalamat si Bise Mayor Garcia kay nagmalampuson ang pagpahigayon sa Balakwit karong tuiga.

“Usa ni ka testament nga ang Cebu City Government seryuso gyud sa atong pag-promote sa arts and culture, ilabi na sa pulong Sugboanon,” ingon sa bise mayor, nga maoy chairman sa Cebu City Cultural and Historical Affairs Commission.

Ingon ni Mayor Rama, pagakit-an niya nga kung buhi pa karon ang iyang manunuwat ug magbabalak nga apohan nga si Don Vicente Rama, segurado siya nga malipayon kini.

Ania ang mga mananaug sa indigay sa balak:

1^st – John Laurence Narbay – Brgy. San Roque

2^nd – Melle Venice Ponce – Brgy. Kasambagan

3^rd – Francis Matahum – Brgy. Bulacao

Ania ang mga mananaug sa awit:

1^st – Joesyl Campugan- Brgy. Tejero

2^nd – Mary Therese Jade Damos – Brgy. Tinago

3^rd – Shakira Dugaduga – Brgy. Mambaling

Sa pakighinabo sa Cebu City News, niingon si Campugan nga anad na siya sa pagkanta kay mangantahay ang iyang mga kaliwat. Gani, nakaabot na siya sa “Tawag ng Tanghalan” nga indigay sa kanta sa ABS-CBN didto sa Manila.

Sa iyang bahin, niingon si Narbay nga ang iyang balak nahimo tungod sa iyang unang pagsulod og imnanan nga kasinatian.

“Kita gyud ko sa pagkupot…sa ilang dughan. Una nako to nga time nga ‘Ha?! Ingon ana diay kasayon? Na-shock lang ko nga ingon ani na diay atong mga kabatan-onan ba,” ingon sa 22-anyos nga 4th year sa kursong mechanical engineering. #