Ni Russel Fullozos
Staff Member

CEBU CITY (Pebrero 20, 2023) — Gipangulohan ni Cebu City Police Office City Director Ireneo Dalogdog ang paglusad karong adlawa sa “CCPO Thunder Cup: Bola Kontra Droga” isip ilang pakighimamat sa mga kabarangayan.

Kabahin kini sa ilang tinguha nga mapalapdan ang ilang kampanya batok ilegal nga drugas, ilabina na aron malikayan ang bisyo nga magtukmod sa kabatanan.

Si Konsehal Dondon Hontiveros maoy pinasidunggang dinapit sa paglusad sa Bola Kontra Droga nga programa. (PIO/Allan Cuizon)

“Kining mga kabatan-onan, ma-divert ang attention, diri sa sports, atong gi-invite kanunay ang hotshot sa Sugbo Konsehal Dondon Hontiveros,” pulong ni P/Col. Ireneo Dalogdog.

Gikalipay ni Banilad Barangay Captain Dennis Tabar nga usa ang iyang lugar diin gipahigayon ang kalihokan.

“Kining maong programa sa kapulisan nindot kay napahigayon diri sa akong barangay, nalipay ko para sa kabatan-unan, kini mao nga edara naa ang tintasyon sa ilegal nga druga labina ang night high school,” pulong niya.

Kining mga kabatan-onan, ma-divert ang attention, diri sa sports, atong gi-invite kanunay ang hotshot sa Sugbo Konsehal Dondon Hontiveros.

CCPO Director Ireneo Dalogdog

Bisan dili niya ka distrito ang Banilad kay anaa kini sa norte, niingon si Konsehal Hontiveros nga abli ang iyang buhatan nga mopaambit sa sports program, nga matudloan sa natad sa basketball ang kabatan-onan sa barangay.

“Ang ‘Bola Kontra Droga sakto kaayo. Matod pa ni City Director Dalogdog, prevention is better than cure, unya ma-incline sila sa sports, malikayan ang mga influence nga magpugong sa ilang development and growth,” pulong niya.

Gawas sa paugnat sa kusog, laing serbisyo nga gipadangat sa CCPO mao ang libreng tupi, medical nga serbisyo, ug libreng lugaw.  #