Ni Russel Fullozos
Staff Member

CEBU CITY (Pebrero 19, 2023) — Kay lagi “lawas ang puhonan” sa atong paningkamot, usa ka “fun run, jog, walk, crawl, Zumba” ang gipahigayon sa kagamhanan sa dakbayan sugod sa Fuente Osmeña ngadto na sa Plaza Independencia sayo karong adlawa.

Nagsugod ang fun run sa Fuente Osmeña ug gitapos sa Plaza Independencia sa may Aduana, o human sa kapin duha ka kilometros. (PIO/Ruel Rosello)

Ang kalihokan kabahin sa sa usa ka semanang pagtamod sa ika-86 ka tuig nga kasumaran sa “Charter Day”, nga saulogon karong Pebrero 24.

Gawas sa mga kawani sa City Hall, lakip sa mga nangapil ang mga tinun-an sa nagkadaiyang kolehiyo ug unibersidad sama sa Cebu Technological University, University of the Visayas, CCMC College of Nursing, ug University of Cebu. Nisalmot sab ang mga sakop sa Philippine National Police sa dakbayan.

Mihatag pa og mga pulong sa kaalam si Mayor Mike Rama sa wala pa sugdi ang fun run sayo kaganihang buntag. (PIO/Ruel Rosello)

Sa iyang pagpamulong atol sa kalihokan, gipahimug-atan ni Mayor Mike Rama ang kahimsog sa panglawas, nga magpabiling piskay ang mga kawani, nga maoy hinungdan nganong gipahigayon ang fun run.

“Lawas ang katigayonan. Health is wealth. Maoy atong puhonan,” pulong niya.

Lawas ang katigayonan. Health is wealth. Maoy atong puhonan.

Mayor Mike Rama

Gilusad sab dungan sa fun ran ang “Move it to Loss it” challenge, nga giapilan sa 14 ka mga kawani sa City Hall nga naghingapin ang timbang. 

Ang mga nangapil sa challenge mopaubos sa upat ka buwan nga pagpagamay. Si kinsa kadtong maoy kinadak-an og nawala sa timbang makadawat sa ganti nga P30,000. Ang ikaduhang labing dako og nawala sa timbang makadawat ug P20,000, samtang ang ikatulo adunay P10,000.

Nagpanon ang mga nangapil sa fun run, nga gisalmotan sa mga kolehiyo ug unibersidad sa dakbayan ug sa mga kapulisan. (PIO/Ruel Rosello)

Kabahin sa fun run, nigawas nga mananaug sa Men’s Category mao si Christian Navarro sa UC Main, nga gisundan nila ni Patrolman Rey Carlo Entrina sa Cebu City Police Office, John John Rey Singson sa Academe System Global College, Fernando Velasco sa Cebu City Disaster Risk Reduction and Management Office, ug Niño Leorna sa Cebu City Youth Development Commission.

Sa Womens Category, nasakmit ni Majie Mahinay sa Cebu City Administrator’s Office ang unang ganti. Gisundan siya nial ni Mary Joy Reuma sa CCT/EUC; Jocelyn Navecilia; sa City Assessor’s Office; Maylene Bendanillo sa UC Main; ug Arlene Pleños sa Cebu City Management Computer Section. #