Ni Nova Jane Yanson
Staff Member
CEBU CITY (Pebrero 17, 2023) — Mouban ug motabang alang sa damgo sa dakbayan nga Singapore-like Cebu City.
Mao kini ang mensahe ni Mayor Michael Rama ngadto sa mga kawani sa Department of Social Welfare and Services (DSWS) atol sa iyang pagdalikyat og sa gipahigayon nga orientation alang kanila kagahapong adlawa, Pebrero 16.
Ang mga kawani mga bag-o ug kadtong nagkihanglan nga lab-ason pag-usab ang ilang nahibaw-an kabahin sa mga serbisyo sa ilang buhatan.
“Kanang damgo nato moingon sila nga ‘Ah, kang Mike Rama rana,’ dili na ako ra. Inyo na nga mga panglangtaw, inyo ng mga pangandoy, inyo ng mga damgo, inyo ng ginganlan nato og pangambisyon,” ingon niya.
“Ato gyud ning buhaton kay kung dili karon, kanus-a? Kung dili kita, kinsa?” dugang sa mayor.
Kanang damgo nato moingon sila nga ‘Ah, kang Mike Rama rana,’ dili na ako ra. Inyo na nga mga panglangtaw, inyo ng mga pangandoy, inyo ng mga damgo, inyo ng ginganlan nato og pangambisyon.
Mayor Mike Rama
Sa mao gihapon nga kalihokan, gihisgotan sab ni Mayor Rama ang himoong lahugay sulod sa City Hall nga sugdan inigkahuman unya sa pagsaulog sa dakbayan sa Charter Day karong Pebrero 24.
Kabahin sa gihimong orientation, niingon si Marie Bongato, administrative officer sa DSWS, nga gibuhat nila kini aron nga mapahinumdoman ang tanan kung unsa nga mga serbisyo ang dalit sa ilang buhatan.
“Kasagaran man gud kung na-assign lang ka ani nga program, kana ra sad ang imohang nahibaw-an. So, kung naay mangutana sa imoha …(unya) murag di ka kahibaw ba. So at least man lang magdungan mi tanan og kaalam kung unsay mga serbisyo sa tibuok departamento,” nagkanayon si Bongato.
Karong adlawa maoy ika-tulo nga hugna sa mga empleyado nga nipaubos sa maong orientation. #
Cebu City • News & Information 