Mayor Mike andam pakamatyan ang dakbayan

Ni Rey Pasaporte
Staff Member

CEBU CITY (Pebrero 17, 2023) — Sama nga wala baliha sa iyang apohan nga nag-inusara nalang sa pakigbisog nga mahimong dakbayan ang kanhi lungsod sa Sugbo, subling gibahad ni Mayor Mike Rama nga kini iyang panalipdan ug pakamatyan.

Kini ang gipadayag sa mayor atol sa pagbukas sa exhibit sa mga handumanan nga kabilin ni Don Vicente Rama sa lobby sa Legislative Building kaganihang buntag.

Hulagway sa makasaysayanong pagpirma sa balaod nga naghimo sa Sugbo nga chartered city. Lakip ang hulagway sa memorabilia ni Don Vicente Rama nga gi-exhibit karon sa may lobby sa City Hall Legislative Building. (PIO/Allan Cuizon)

Ang exhibit kabahin sa usa ka semanang pagtamod sa ika-86 ka tuig nga kasumaran sa Cebu City Charter Day.

“Ang utok sa among lolo futuristic, ngilngig kaayo’g foresight, visionary. Mao na si Don Vicente Rama. Mao na ako, inig-abot sa Charter Day, di gyud mahimo nga daugdaogon ang siyudad sa Sugbo,” pulong sa mayor.

“Barogan ug pakamatyan ni Mayor Mike Rama ang siyudad sa Sugbo,” dugang niya.

Ang utok sa among lolo futuristic, ngilngig kaayo’g foresight, visionary. Mao na si Don Vicente Rama. Mao na ako, inig-abot sa Charter Day, di gyud mahimo nga daugdaogon ang siyudad sa Sugbo. Barogan ug pakamatyan ni Mayor Mike Rama ang siyudad sa Sugbo.
Mayor Mike Rama

Sa iyang bahin, gidayeg ni Bise Mayor Raymond Alvin N. Garcia, nga mao sab ang chairman sa Cultural and Historical Affairs Commission (CHAC), si Don Vicente tungod sa iyang mga kalamposan isip alagad sa katawhan, peryodista, tigmantala, ug manunuwat.

“Mao na makaingon ko usahay ‘basi’g paryente nako si Don Vicente Rama.’ Ngano man? Tan-awa ang iyang passion, he was into writing, unya ang among pamilya writing baya kay SunStar (newspaper) baya mi, di ba?” pulong sa bise mayor.

“Unya ang iyang gisuwat, ‘Ang Bag-ong Kusog’,unya ang akong amahan nagtukod og partido ang pangan ‘Kusug’. Basin ako ning paryente si Don Vicente Rama da,” dugang pamahayag nga dala pangomedya sa bise mayor.

Ingon niya, nag-una si Don Vicente sa natad sa Sinugbuanong peryodismo ug literatura kay niadtong mga panahona ang pinulongang Binisaya wa kaayo gamita sanglit panahon sa mga Katsila.

“He (Vicente Rama) also wrote man fiction, he wrote poems, he wrote short stories, he wrote novels. Why am I pointing this out is because ang atong mga batan-on karon, ang atong mga anak, wala na kaayo silay idea on Cebuano history…who he was,” pulong ni Bise Mayor Garcia.

Tungod niini, giingon sa bise mayor, isip chairman sa CHAC, nga ilang paningkamotan nga malabot ang Cebuano history sa pagtudlo sa mga tunghaan sa atong mga kabataan.

Ingon ni Mayor Rama, bililhon sa ilang pamilya ang paghinumdom sa ilang apohan ug dili nila igsapayan kung gikalimtan nalang sa uban ug wa mahinumdomi ang gibilin sa ilang apohan.

Mga sinuwat ni Don Vicente Rama nga apil sa exhibit nga kasamtangang anaa sa lobby sa City Hall Legislative Building. (PIO/Allan Cuizon)

“Pero sa mga Rama mortal sin kana kung among kalimtan ang dugo nga naglatay sa among kinatibuk-an nga lawas. Kaming mga Rama mortal sin kana nga kalimtan namo diin mi gikan,” sulti niya.

Gibalik niya og hisgot unsa nga sa wala pa pirmahi ni Presidente Manuel Quezon ang balaod nga naghimo sa Sugbo nga chartered city, nga saulogan sa dakbayan kada Pebrero 24, si Don Vicente nag-inusara nalang nga naningkamot kay mismo ang taga-Sugbo nga mga pulitiko supak niini. #