Ni Rey Pasaporte
Staff Member

CEBU CITY (Feb. 11, 2023) – Laraw karon sa Bantay Dagat Commission sa kagamhanan sa dakbayan ang pagpalit og usa ka patrol boat nga magamit batok sa mga mananagat nga may ilegal nga kalihokan.

Soledad. (PIO/File)

Matud ni Retired Lt. Col. Alexander Soledad, executive director sa Bantay Dagat Commission, nga aduna nay interesadong supplier sa patrol boat nga nitanyag sa ilang produkto.

“I think it was the Vice Mayor (Raymond Alvin N. Garcia); naa silaý proponent nga nag present atong dealer sa patrol boat intended for Bantay Dagat,” ingon niya.

Nanghinaut siya nga matuman ang pagpalit sa patrol boat nga nagkantidad og P6 milyones ngadto sa P8 milyones.

“Nagkinahanglan gyud ta’g sea asset to protect our seas against illegal fishers, protect the marine life,” ingon ni Soledad.

Nagkinahanglan gyud ta’g sea asset to protect our seas against illegal fishers, protect the marine life.

Retired Lt. Col. Alexander Soledad, executive director sa Bantay Dagat Commission

Sa mao gihapong tigom sa Bantay Dagat, gipresentar sab ni Retired General Anderson Comar, special projects assistant ni Mayor Mike Rama, ang Rapid Response Unsinkable Boat nga ginama sa fiber glass nga gisapawan og foam.

Sa tibuok Pilipinas ang lokal nga pangagamhanan pa sa Mariveles, Bataan ang anaay Rapid Response Unsinkable Boat.

Gamit unya kaayo ang Rapind Response Unsinkable Boat sa pagtubag og sunog ilabi na sa mga dapit nga daplin sa dagat. (Hulagway: Unsinkable Rapid Response Boat by Rouvia Facebook Page)

Matud ni Comar, dili lang magamit sa operasyon sa Bantay Dagat kundili magamit sab kini sa pakigbugno sa kayo ang maong sakyanang pangdagat, sama pananglitan kung adunay masunog nga barko o kaha masunog ang kabalayan daplin sa dagat.

“Ang Rapid Response Unsinkable Patrol Boat, bisan pa’g mabuslot na siya di’ gyud malunod. Kay this is coated with foam, unlimited ni iyang water supply kung naay fire fighting operation ,ideal siya sa…sa operation,”sulti niya.

Comar. (PIO/Allan Defensor)

“Sa Bantay Dagat kinahanglan pud siya. Ngano? Naa man siyaý kapasidad mo-aresto o mo-verify sa mga pumpboat nga unsay mga karga,” dugang niya.

Laing gihisgutan sa tigom mao ang pagparehistro sa tanang mga mananagat sa kinse ka mga barangay sa dakbayan nga anaa sa kabaybayonan.

Matud ni Soledad, kinahanglan lang nga ang mananagat walay record nga nalambigit sa illegal nga panagat.

“(He) should be a registered voter and a resident. Naa kay (mananagat) certificate of residency sa barangay diin ka nagpuyo,” nagkanayon siya. #

Gamit sab kaayo ang Rapid Response Unsinkable Boat alang sa pagtubag og sunog nga nahitabo sa mga barko. (Hulagway: Unsinkable Rapid Response Boat by Rouvia Facebook Page)