Ni Nova Jane Yanson
Staff Member

CEBU CITY (Pebrero 7, 2023) — Gitigom kagahapong adlawa ang mga kapitan ug tinugyanan gikan sa 80 ka mga barangay sa dakbayan aron sabotan ang papel sa mga barangay kabahin sa programang “Oplan Panindot sa Palibot” sa kagamhanan.

Malou Rama. (PIO/File)

Nangulo sa tigom ang first lady sa dakbayan, Malou Rama, ug ang labaw sa Cebu City Environment and Natural Resources Office (CCENRO) nga si Arlie Gesta.

Gihisgotan atol sa tigom unsay buhaton sa mga barangay, nga maglakip sa pag-ila og dapit nga tamnan ug panindoton o kaha butangan og mural painting.

“Mao ng gipatawag karon ang mga 80 ka barangay para pod ma-aware pod mo kung unsa ni ang Oplan Panindot sa Palibot,” nagkanayon si Malou.

“At least maka-suggest ang mga barangay unsa inyo mga concerns, kay kamo man ang nakahibawo sa inyong barangay kung unsaon ninyo pagpanindot,” dugang niya.

Atol sa tigom nahisgotan sab ang paglusad sa pagtanom sa kahoy, pagpanindot, ug mural painting nga dungan nga pagahimuon sa tibuok dakbayan karong Pebrero 17. #

Cebu City Environment and Natural Resources Office (CCENRO) Chief Arlie Gesta (with microphone) explains to the barangay captains and barangay representatives the Oplan Panindot sa Palibot program. (PIO/Ruel Rosello)