Ni Rey Pasaporte
Staff Member
CEBU CITY (Enero 7, 2023) — Padayong gipalambo sa Cebu City Disaster Risk Reduction and Management Office ang mas malukpanong plano sa pagtubag sa katalagman.
Kini ang gipadayag sa labaw sa CCDRRMO nga si Harold Alcontin human sab sa pag-igo sa makusog kaayo nga linog sa mga nasud sa Turkey ug Syria bag-o lang nga nikalas og liboan ka mga kinabuhi.
Karong adlawa, nagpahigayon og pakigtagbo ang CCDRRMO sa mga taga-Philippine Institute of Volcanology and Seismology (Phivolcs) kabahin sa pagbansay mahitungod sa linog.
“Usa ni sa atong program this year. Kinahanglan naa ‘tay comprehensive nga response plan for earthquake,” ingon ni Alcontin.
Kini may kalabotan sab sa ipahigayon unya nga laing earthquake drill karong buwana nga salmotan sa mga kawani sa local nga pangagamhanan sa dakbayan.
Atong gibuhat karon part gyud ni sa atong disaster preparedness plan ilabina katong gibuhat nato sa niaging tuig sa last quarter nga nag-earthquake drill ta,” pulong ni Alcontin.
“Natayming lang nga naglinog sa Turkey. Usa ni sa atong program this year nga kinahanglan naa tay comprehensive nga response plan for earthquakes,” dugang niya.
Natayming lang nga naglinog sa Turkey. Usa ni sa atong program this year nga kinahanglan naa tay comprehensive nga response plan for earthquakes.
Harold Alcontin, labaw sa CCDRRMO
Matud niya, ila sab nga tan-awon kung unsa nga mga balaod nga mahimong ipalabang sa Konseho sa Dakbayan kabahin sa kaandam sa mga istruktura dinhi sa siyudad.
“Kahibawo man ‘ta sa Cebu City, daghan kaayong mga karaang structures,” ingon niya.
Gihinumdom niya nga niadtong Oktubre 2013, dihang nitay-og ang 7.2 magnitude nga linog sa Sugbo, dunay napagawas nga ordinansa ang dakbayan nga nagmando sa mga tag-iya ug istruktura nga kinahanglang bag-ohon kini ilabi na ang mga anaa sa downtown nga bahin.
Ang panagtagbo nga nahitabo karong adlawa gituyo aron makatabang ang Phivolcs, pinangulohan ni Engr. Robinson Jorgio, sa CCDRRMO pinaagi sa mga mga datos nga mapalambo pa unya nila.
Lakip sa hatagan og pagtagad ang mga angay buhaton sigon sa gikusgon sa linog.
“Usa ni sa atong gitan-aw nga mo set ta og protocol, nga kung moingon ta intensity 5 to 6 bakwit gyud ta, uli ta,” ingon ni Alcontin. #
Cebu City • News & Information 