CEBU CITY (Enero 31, 2023) – Moabot sa 4,000 ka mga pamilya ang siguradong lakip unya sa makapahimulos sa tukorong 300 ka mga medium-rise building sa kagamhanan sa dakbayan, nga panghingusgan sa administrasyon ni Mayor Mike Rama sugod karong tuiga.

Kini ang gibutyag ni Atty. Jerone Castillo, special assistant sa mayor, atol sa gipatawag ni Mayor Mike Rama nga press conference karong hapon.

Matod ni Atty. Castillo, nga maoy co-chairman sa Task Force Gubat sa Baha sa kagamhanan, nga nahuman na asila sa pag-ila si kinsa kadtong apektado sa pagpatuman sa tres metros nga easement sa walo ka mga kasapaan sa dakbayan.

Si Mayor Mike Rama (tunga) kauban sila si Atty. Jerone Castillo (wala) ug si Atty. Collin Rosell atol sa gipahigayong press conference hapon karong adlawa. (PIO/Allan Defensor)

Pulong niya, dili mominos 4,000 ka mga pamilya ang siguradong papahawaon sa ilang kasamtangang nahimutangan karon kay nakalapas sila mga balaod sa easement.

Ang maong mga balaod nga naglatid nga tres metros gikan sa masigka-tampi sa mga sapa kinahanglang wala gyuy bisan unsa nga istruktura.

Matud ni Castillo, padayon ang dakbayan sa pakig-alayon sa Pagibig Fund ug sa Department of Human Settlements and Urban Development alang sa pagpuyo sa maong mga lumolupyo sa dakbayan.

Supak sa balaod ang pagtukod og bisan unsang istruktura sulod sa tres metros gikan sa masigka-tampo sa kada sapa dinhi sa dakbayan. Ang mga istruktura sama sa mga panimalay nga nakalapas pagagub-on sa kagamhanan. (PIO/File)

Sumala sab ni Atty. Collin Rosell, executive secretary sa mayor, ang maong mga pamilya papuy-on sa mga MRB’s nga libre apan padayong tan-awon ang ilang katakos sa pagbayad.

Sigun niya, mahitabo unya nga adunay mga lumolupyo nga adto na ibutang sa bahin nga sila mag-abang, hangtud nga adto na gyud sila sa “rent-to-own”, nga magbayad sila hangtud nga maimpas ang ilang gipuy-an ug mailaha na.

Ang pinirmahay sa Joint Venture Agreement tali sa Cebu City Government Employees Housing Cooperative (CCGEHC) ug kagamhanan sa dakbayan ug sa T-11 Corporation alang sa katukoran sa usa ka medium-rise building (MRB) alang sa mga kawani sa City Hall. (PIO/File)

Gibutyag ni Rosel nga anha tukoron ang 300 ka mga MRBs dapit sa duol sa baybayon sa may Barangay Duljo Fatima ngadto na sa Barangay Mambaling. Moabot unya sa lima ka andanas ang kada edepisyo ug makaigo og 100 ngadto sa 150 ka mga pamilya ang kada usa.

Kabahin sa pabalay alang sa mga kawani sa City Hall, niingon si Rosell nga padayon sab ang paglihok sa kagamhanan alang niini.

Gani, bag-ohay lang nga gipirmahan ang kasabotan alang sa katukoran og usa ka MRB nga igahin alang sa mga kawani sa yuta sa kagamhanan sa silingang dakbayan sa Talisay. (PIO/rhm)

P50B annual budget approved, more than half for MRBs