By Renato Pasaporte
Staff Member

CEBU CITY (Enero 19, 2023) —  Si Bise Mayor Raymond Alvin N. Garcia maoy mosaksi sa ika-50 ka tuig nga kasaulogan sa Sinulog sa lungsod sa Carmen karong Domingo ug modala sa ngalan sa Dakbayan sa Sugbo atol sa kalihokan.

Bise Mayor Garcia. (PIO/File)

Kini ang gibutyag sa bise mayor human sab sila magkaistorya ni Mayor Mike Rama, nga nisulti kaniya nga maoy patambongon kay lagi aduna na siyay laing lakaw o tambongan sulod sa upat ka mga adlaw.

Wala ra say pagsupak ang bise mayor kay daan na siyang naglaraw nga motambong sa Sinulog sa Carmen isip maoy presidente sa Vice Mayors League of the Philippines-Cebu Chapter. 

“Daghan kaayo kong mga sangga nga mga vice mayors nga nangimbitar nako nga paadtuon ko. So, I really planned already to go sa Carmen kay halos tanang mga vice mayors tua na man didto,” sulti ni Bise Mayor Garcia.

Ingon niya, ang iyang pagtambong pagpakita sab sa dakong suporta sa Dakbayan sa Sugbo, dili lang alang sa lungsod sa Carmen kundili lakip na sa Probinsya sa Sugbo.

Nag-una kang Bise Mayor Raymond Alvin N. Garcia sa pag-adto sa lungsod sa Carmen kining mga taga-plumbing section sa Local School Board sa kagamhanan sa dakbayan nga gipangulohan ni Engr. Janpol Cuadero, kay motabanga sa pagpangandam sa ika-50 nga kasumaran sa Sinulog sa Carmen. (Hulagway: Local School Board)

Pagpakita sab kini, matud pa, sa dakbayan sa lima ka mga contingent kinsa mangadto didto sa Carmen aron moapil sa panagsangka Domingo.

“Mao nga karong Domingo moadto ko didto representing the City of Cebu and also representing as President of the Vice Mayors League of the Philippines,” pulong niya.  #

Wala pa nakahukom ang Tribu Lumad Basakanon sa Barangay Basak San Nicolas kung modayon ba kini sa pagsalmot sa Sinulog sa Carmen karong Domingo, Enero 22, 2023. (PIO/File)