Barangay Paril aduna nay pangpublikong merkado

Ni Nova Jane Yanson
Staff Member

CEBU CITY (Enero 19, 2023) — Sa una, kinahanglan pang motugbong si Agnes Goc-ong, 38, gikan sa ilang barangay sa Paril aron mangompra sa sentro sa dakbayan.

Kapoy, gasto, apan kinahanglan, kay wala man silay mapalitan sa bukirang barangay sa Paril, nga nahimutang 25 kilometros gikan sa kinapusoran sa siyudad.

Karong adlawa, lakip siya sa mga lumolupyo nga nipadayag sa ilang kalipay aduna na gyuyd pambublikong merkado sa ilang lugar nga pormal nga giablihan karong adlawa.

“Diri kumpleto na gyud. Naa nay mga lamas unya makapalit na mi og mga presko nga manok ug mga isda. Dili na magbiyahe-biyahe ug kaplite sa layo unya affordable ra sad kaayo ang mga presyo. Dako gyud og kalipay ang mga tawo diri,” nagkanayon si Agnes.

Ang bag-ong merkado, nga maoy labing una nga natukod sa bukirang bahin sa dakbayan, adunay 35 ka mga stalls nga gipwestohan sa mga manindahay nga sagad mga taga-Paril ra sab.

“Dako gyud kaayo namong pasalamat nga naa na mi diriy merkado bitaw nga makatinda mi…. Sa una, naninda ko diha sa may eskwelahan unya putos-putos ra bitaw nako. Wa jud koy pwesto ba. Karon nga naa nay merkado diri, dako gyud nakong kalipay,” pulong ni Vangie Codino, 43.

Matod ni Paril Barangay Captain Nerissa Doncillo, barato ra ang mga baligya sa ilang merkado kay gisiguro nila nga dili magpatuyang ang mga namaligya.

“Sa mga vegetables, tanan naa na silay range og pila lang dapat. Dili sad sila pwede mag-overpricing. Ubos ra gyud ta, kay like sa mga vegetables diri man sa atoa gikan,”  pulong niya.

Sa iyang bahin, niingon si Kapitan Doncillo nga gawas sa mga taga-Paril makapahimos sab sa maong pampublikong merkado ang mga lumolupyo sa silingang mga barangay sa dakbayan sa Sugbo sama sa Lusaran, Cambinocot, Guba, ug ang mga nasakop na sa lungsod sa Compostela.

Ang merkado natukod gamit ang pundo gikan ni Kongresista Rachel Del Mar. Usa ka misa ang gipahigayon sa wala pa ang ribbon cutting.

Nitambong sa gihimong seremonyas pagbukas sa merkado si Konsehal Franklyn Ong, nga nipadayag sa iyang kalipay sa dakong tabang nga ikahatag sa merkado ngadto sa mga tawo.

“Makatabang ni sa katawhan nga dili na gyud layo kung naa silay kumprahon, unya hinaot nga molambo gyud ning public market nga makatabang sa mga namaligya. Ug gikan sa uban nga barangay moanhi sila diri para mangompra sa ilang mga kinahanglan,” pulong niya. #