Ni Russel Fullozos
Staff Member

CEBU CITY (Enero 14, 2023) — Human sa duha ka tuig nga pagkawala tungod sa pandemya, gibuhi pagbalik ang lumbaanay sa mga baroto atol sa Sinulog karong adlawa, hain 41 ka mga mananagat, lakip ang mga taga-gawas sa dakbayan, ang nisalmot niini diha sa South Road Properties (SRP).

Ang baroto maoy panagatan sa mga Sugboanong mangingisda sa wala pa nibutho ang mga panagatang de makina. (PIO/Allan Cuizon)

Ang “Balik Baroto Regatta” gituyo sa Fraternal Order of Eagles-Philippine Eagles Inc. Central Visayas Region ug sa lokal nga pangagamhanan sa dakbayan sa  Sugbo aron pagbuhi sa panumdoman sa nga kabatan-onan unsa ang tradisyonal nga sakayan nga baroto lakip na ang mga gamit nga bugsay, layag, ug uban pa.

Nidaug kaganiha ang taga-BarangayTangke, Talisay City nga sila si Virgilio Cabandos ug Martin Abidenes, nga nakatala ug 38 minutos ug 40 segundos, nga ligas lang unom ka segundos sa nagsunod. Ang ikatulo nakatala og 39 minutos ug 21 segundos.

Ang midaog sa lumbaanay sa Baroto Regatta magbinahinay sa kantidad nga P100,000. (PIO/Allan Defensor)

Makapakurat nga P100,000 ang ganti sa mananaug; P75,000 sa ikaduha; ug P50,000 sa ikatulo.

Si kanhi custom collector Kuya David “Boy” Odilao maoy nangulo sa pagpasiugda sa maong kalihokan, nga iyang gikalipay kay lagi nagpabilin ang karaang tradisyon sa mga Pilipino nga maggamit sa bugsay ug layag alang sa ilang paglawig.

Sila si Virgilio Cabandos (wala) ug Martin Abidenes (kaduha gikan sa wala) maoy nangharos atol sa lumbaanay sa mga baroto sa may SRP. (PIO/Russel Fullozos)

“Gibuhi gyud ni nako nga kalihokan aron magpabilin nga timaan sa katawhan nga bisan sa ka-moderno sa panahon, epektibo gihapon siya,” pulong niya.

Si Odilao maoy giila nga “Amahan sa Sinulog” kay lagi siya man ang nangulo sa pagpahigayon sa labing unang grade parade niadtong 1980 aron sab nga dili mawala sa paglabay sa panahon sa paghalad og pag-ampo pinaagi sa pag-sinug. #