Ni Rey Pasaporte
Staff Member

LAHUG, Cebu City (Enero 3, 2022) — Dili malimot kung diin gikan.

Kini ang giluwatang pahimangno ni Mayor Mike Rama isip pinasidunggang dinapit atol sa pagpanumpa sa bag-ong mga doktor nga gipahigayon sulod sa Waterfront Cebu City Hotel & Casino karong adlawa.

Ingon niya, kinahanglang anaa kanunay sa kasingkasing ang pagkamapasalamaton ug ibutang sa hunahuna ug dili kalimtan o kaha talikdan kadtong mga nakatabang nga maabot nila ang maong ang-ang sa ilang kinabuhi.

“Gratitude should always be a part in your heart…. Do not forget your parents. Do not forget your lolos or lolas. Do not forget the sponsors and guardians. Usahay raba no modako na atong ulo, ilabi na daghan na kaayo ta’g professional fees makalimot diin ta gikan,” sulti sa mayor.

Tambag sab niya mao nga mahalon sa mga bag-ong doktor ang ilang propesyon, inubanan sa pag-ampo sa Ginoo kay lagi natuman na man ang ilang pangandoy.

Mokabat 500 ka mga bag-ong doktor nga nagagikan 21 ka unibersidad tibuok nasud nga nakapasar sa board exam sa niaging tuig ang nitambong sa okasyon.

Gratitude should always be a part in your heart…. Do not forget your parents. Do not forget your lolos or lolas. Do not forget the sponsors and guardians. Usahay raba no modako na atong ulo, ilabi na daghan na kaayo ta’g professional fees makalimot diin ta gikan.

Mayor Mike Rama

Nilakbit si Mayor Rama atol sa iyang pagpamulong sa pagdapit sa tanan, ilabi na ang mga ginikanan nga gikan pa sa lagyong mga lugar, nga mosaksi sa mga kalihokan sa Sinulog karon ug sa sunod semana.

Sa iyang bahin si Dr. Peter Mancao, presidente sa Cebu Medical Society, niingon nga una kining higayon nga ang dakbayan sa Sugbo ang nagdumala pagpanumpa sa bag-ong mga doktor.

Ang kapin sa 500 ka mga bag-ong doktor gikan sa 20 ka mga unibersidad sa nasud nga gipapanumpa ni Mayor Mike Rama. (PIO/Allan Cuizon)

“Today is extraordinary day for all of us, especially to our new physicians who are very excited to attend this event…. This is a special day for you and your parents, sponsors and significant others,” ingon niya.

“Although this may not be the biggest peak of achievement, this achievement serves as your path to move forward and start your career in medicine,” dugang ni Dr. Mancao. #