Ni Renato B. Pasaporte
PIO Staff Member
CEBU CITY (Dec. 28, 2022) – Isda’ng tinola, inun-onan, kinilaw ug sinugba mao’y mga kinaham ni lola Efigenia Macuto Bardos sa iyang inadlaw nga pagkaon, ug naa pa, hold your breath – beer!
Wala ra’y pili si lola Victoriana Ubod kay mokaon ra siya og bisa’g unsa. Apan ang iyang sikreto – dili gyud siya masuko.
Naabot na nilang Lola Efigenia ug Lola Victoriana ang pangedarong 100 karong tuiga, 2022, si Lola Efigenia pagka-Septyembre 21, samtang si Lola Victoriana pagka-Agosto 20.
Gipasidunggan ug gipahalipayan sila sa dakbayan kaganihang buntag sa kantidad nga moabot sa susama sa ilang pangedaron nga mil pesos sa dihang gibisita sila sa mga sakop sa Office of the Senior Citizens Affairs (OSCA).
Cash gift nga P100,000 ang natunol kang Lola Efigenia sa iyang pinuy-anan sa Sitio Bayabas, Mambaling gikan ni Vicente “Enting” Esmeña, tagduma sa OSCA.
Samtang P85,000 ang nahatag kang Lola Victoriana sa iyang balay sa Napo, Sapangdaku kay daan na siyang nakadawat og P15,000 sa dihang mi-edad siya og 90, matod ni Esmeña.
Unang gibisita sa OSCA diha sa Mambaling si Lola Efigenia, nga kanhi Miss Hilongos sa iyang kabatan-on kaniadto.
Sa iyang kaminyoon, aduna siya’y 12 ka anak, siyam niini babaye, ug 36 tanan ka mga apo. Maayo pa ang iyang pandungog ug makabasa pa siya sa gagmay’ng letra sa iyang pagpirma sa mga dokumento sa OSCA.
Hangyo niya sa labaw nga Makagagahom nga hatagan siya kanunay og hangin para sa iyang gininhawa.
Matud sa anak niya’ng si Belen Bardos Kiehn, 70, ganahan gyud og isda iyahang inahan, ilabi na kung kinilaw, paresan usahay og serbesa. Wala sa’y gidili niya nga kan-onon sa iya na karong pangedaron, siya midugang.
“Kami mga anak, moingon nalang nga tagaan namo sa iyang ganahan, pero mostly mga isda among sud-an pirme ug vegetables,” tug-an sa anak.
Gikan sa Mambaling, miderecho ang koponan sa OSCA ngadto sa Sapangdaku sa pinuy-anan ni Lola Victoriana kinsa maayo pa ang lawas sa pagtangkod niya’g ika-100 nga pangedaron.
Apan niadtong buwan sa Oktobre, gasugod nga na-admit siya sa tambalanan tungod sa gihambin nga balati-an, hinungdan hangtod karon kanunay na siyang maghigda.
Sa iyang kaminyoon, aduna siya’y siyam ka mga anak, unom ang lalaki samtang tulo ang babaye.
Tug-an ni Lola Victoriana nga ang sekreto niya nganong niabot siya sa iyang pangedaron mao nga dili gyud siya masuko, kaniadto pa ug hangtod karon.
“Akong pangaliya sa Ginoo nga hatagan pa ko og taas nga kinabuhi,” sulti niya.
Matud sa anak nga si Rosalina Ubod, duha na ka managsuon ang namatay. Siya mao’y nag-atiman sa ilang inahan sukad pa kaniadto.
Sa kahimtang sa iyang inahan, ingon ni Rosalina nga nadala pa nila sa pag-ampo kay kadaghan naman siya nadala sa tambalanan.
“Kadaghan na jud mi ani nakaagi mga, hapit na gyud ba, nya madala pa jud og pag-ampo. Balibaran nami sa mga doktor nga amo siya’ng ipa-ICU, pero naluwas pa jud ang akang inahan,” sulti ni Rosalina. # (PIO/ReyPas)
Cebu City • News & Information 