Vote Counting Machine nga nasulod sa ballot box gikuha na

Ni Rey Pasaporte
Staff Member

SOUTH ROAD PROPERTIES, Cebu City (Disyembre 23, 2022) — Gibuksan kagahapong adlawa ang usa ka ballot box dinhi sa dakbayan aron kuhaon ang Vote Counting Machine (VCM) nga giapil ug sulod sa Board of Election Inspectors sa niaging piniliay niadtong Mayo 9.

Subay kini sa suwat sa Commission on Elections (Comelec) sa Manila human nga dili kabayran ang forwarding nga kompanya nga mao untay mopadala dayon sa VCM sa kaulohan human sa pag-ihap sa mga balota, kay lagi dili kumpleto ang naabot nga mga VCM.

Matud ni Megumi P. Tapia, Election Assistant II sa Cebu City Comelec south district, ang sakto unta mao nga kung mahuman ug naa nay resulta sa ilang presinto, ang mga maestra nga maoy naglangkob sa BEI mohatag sa VCM ngadto sa F2 Logistics nga maoy modala niini ngadto sa ulohang buhatan sa Comelec.

Apan naunsa bang pagkaunsa-a nga may usa ka clustered precinct sa Barangay Sto. Niño kansang BEI nisulod man og apil sa VCM sa ballot box ug kuyog kining gisilyohan.

Gisugdan og putol niining usa ka kawani sa Department of General Services sa City Hall ang mga silyo sa ballot box aron makuha ang Vote Counting Machine nga naapil pagsulod human sa piniliay niadtong Mayo 9. (**PIO**/Allan Cuizon)

Kini ang hinungdan nganong alas 11 pasado kaganihang buntag nisaksi ang mga tinugyanan sa Comelec, City Treasurer’s Office, partido Barug PDP-Laban ni Mayor Mike Rama, ug Bando Osmeña Pundok Kauswagan (BOPK) ni kanhi Mayor Tomas Osmeña sa paghabwa sa mga balota nga gisulod sa container van nga gibutang sa compound sa Department of General Services (DGS) sa South Road Properties.

“Kuan ni siya, ang pag-retrieve atong na-inadvertently stored in the ballot box nga VCM. Proseso unta ana, after sa elections, ibalik sa F2 Logistics. Karon ang electoral board nalimot sa instruction, ilang gisulod (apil) sa ballot box,” ingon ni Tapia.

Kuan ni siya, ang pag-retrieve atong na-inadvertently stored in the ballot box nga VCM. Proseso unta ana, after sa elections, ibalik sa F2 Logistics. Karon ang electoral board nalimot sa instruction, ilang gisulod (apil) sa ballot box.
Megumi P. Tapia, Election Assistant II sa Cebu City Comelec south district

Matud niya, gipadad-an sa Comelec-Manila og suwat ang Barug PDP-Laban ug ang BOPK nga mosaksi sa pagkuha sa VCM.

Ingon ni Tapia, bisan pa gani og dili under protest ang natumngan nga ballot box, kinahanglan gyud nilang pahibaw-on ang duha ka partido aron mosaksi sa paghabwa sa VCM.

Usa ka ballot box nga may nag-andar nga Vote Counting Machine sa ibabaw. Kuha ang hulagway atol sa usa ka pagpakita nga gipahigayon sa lokal nga Commission on Elections dungan sa usa ka pagbansay sa mga ICT coordinators niadtong Abril 4, 2022 sa City Hall Social Hall. *(**PIO**/File)*

“Di sad ni siya dihadiha makuha (ang VCM) kung way approval sa Manila Central Office. Ang ballot box ani kay sa clustered (precinct) number 3,” pulong niya.

Kun mabalik na ang VCM ngadto sa Comelec-Manila, bayaran na unya niini ang F2 Logistics. #