Ni Rey Pasaporte
Staff Member
COGON PARDO, Cebu City (Disyembre 22, 2022) — Usa ka semana kapin sa dili pa matapos ang tuig 2022, ang mga lumolupyo dinhi nakapahimulos sa libreng serbisyo sa dul-an 30 ka mga departamento sa kagamhanan ilawom sa program nga City Hall at Your Doorstep (CHAYD).
Kada-Biyernes mahitabo ang CHAYD sa usa sa 80 ka mga barangay sa dakbayan apan lagi kay ugma petsa 23 na, duol na kaayo sa Pasko, gituyo nga karon kini ipahigayon dinhi nga barangay.
Usa sa mga nilinya aron maatiman mao si nanay Lilia Caballes, 58, nga nagpabakuna og anti-flu ug nagpahiling sa iyang dugo.
Pulong niya, sa iyang mga silingan siya nakahibawo nga adunay libreng mga serbisyo sama sa medical checkup nga ipahigayon karong adlawa sa ilang barangay gym maong nisayo gyud siya sa paggikan.
“Nisayo ko para masayo ko og human pud sa akong pagpacheck up diri,” ingon niya.
Gawas nga nahiling og doktor, gihatagan sab siya og vitamins ug tambal alang sa iyang high blood pressure.
Ang libreng konsulta usa lang sa mga serbisyo nga dalit sa CHAYD, hain niduyog sab ang ubang mga nasudnong buhatan sama sa Philippine Statistics Office ug lakip na ang Integrated Bar of the Philippines.
Laing nakapahimulos gihapon sa libreng mga serbisyo mao si Felda Taduan, 31, nga nagdala sa iyang anak nga giubo.
Girisitaan siya og tambal para sa iyang anak ug giingnan nga dad-on ang bata sa Cebu City Medical Center aron adto niya pangayoan sa tambal nga giresita kay wala kini nalakip sa mga libreng tambal nga gidala alang sa CHAYD.
Sa iyang bahin, niingon si Isabelita Basalo, 55, nga nagpaibot sa iyang ngipon, nitug-an nga wa na siya makaagwanta sa pagpunay og suol sa iyang ngipon hain ang kasakit mosanting na sa iyang ulo.
Sa dihang nakahibawo siya nga dunay libreng ibot karong adlawa, sayo siyang nianhi sa gym.
Matud niya, dako na kaayo nga tabang ang libreng ibot itandi kung mogasto pa siya og dako-dako kung adto magpaibot sa pribadong klinika.
Ang pagpahigayon sa CHAYD sa Cogon Pardo ug puhon sa tanang 80 ka mga barangay sa dakbayan katuman sa saad ni Mayor Mike Rama ug Bise Mayor Raymond Alvin N. Garcia atol sa pangampanya alang sa piniliay niadtong Mayo.
Tuod man, una kining gipahigayon sa bukirang Barangay sa Sudlon I niadtong Hulyo 15, o mga duha ka buwan human napili si Mayor Rama ug Bise Mayor Garcia.
Tuyo nga gibuhi sa administrasyon ang programa aron dili na makagasto pa ang mga tawo, ilabi na kadtong anaa magpuyo sa bukirang mga barangay.
Ug sukad kini gisugdan sagad sa hugopan sa mga tawo mao gyud ang serbisyong medical sa City Health Department ug sa Cebu City Medical Center, ug ang libreng kapon ug ligate sa iro ug iring nga tanyag sa Department of Veterinary Medicine and Fisheries. #
Cebu City • News & Information 