Ni Rey Pasaporte
Staff Member
CEBU CITY (Disyembre 17, 2022) — Ipalit og pagkaon, maintenance sa tambal, ug kay Pasko man lagi sinina alang sa Christmas party.
Kini ang sagad gipadayag sa mga inahan nga nikuyog sa ilang mga anak nga nikobra atol sa pagpanghatag sa hinabang pinansiyal sa lokal nga pangagamhanan alang sa mga Persons With Disability (PWD) dinhi sa dakbayan sa 80 ka mga barangay niining dakbayan.
Niingon si Portia Basmayor sa Department of Social Welfare and Services (DSWS) nga adunay 13,176 ka rehistradong PWD sa dakbayan nga modawat og tag-P2,000 nga alang sa mga buwan sa Nobiyembre ug Disyembre.
Sama sa naandan, kinahanglang kuhaon ang maong kantidad sulod sa 10 ka mga adlaw kay kung dili mobalik kini sa panudlanan sa kagamhanan og dili na mahimong makobra pa.
Si Amparo T. Basañez, 65, taga-barangay Guadalupe, nga nikuyog sa iyang anak nga si Jay 25, niingon nga ang kwarta ipalit niya og sinina alang sa anak nga adunay Christmas party sa eskuylahan niini nga Special Education program.
“Palitan nako siya’g sinina niya kay party man karong hapon nila, ‘nya exchanging gift nila, ‘nya para kaon sad ‘nya BYOP man mi. Ang importante ani ipalit og butang niya para sa eskuylahan kay naa man siyay project,” sulti ni Amparo.
“Kada dawat niya magpapalit gyud na siya og bag-o,”dugang sugilon niya.
Lahi ang rason ni Presentacion Gabutan, 52, kinsa maoy kuyog sa iyang anak nga si Carlo,21, kay ang P2,000 iyang ipalit og pagkaon.
Matud niya, ang kwarta magamit alang sa pagkaon sa iyang pito ka mga anak sanglit wala na siyay bana ug usa lang siya ka labandera sa ilang dapit sa Guadalupe.
“Among ni isapar-sapar at least naay moabot ipalit og konsumo…. Dako gyud m pasalamat sa mayor ilabina sa mga konsehal kay makatabang gyud ni ang kwarta,” ingon ni Presentacion.
“Kani pangpalit sa mga tambal, maintainance…. Naa koy maintainance sa heart, magamit ni siyang kwartaha,” Sulti sab ni Robert Lua, 32, taga-barangay Lahug. #
Cebu City • News & Information 