CARBON PUBLIC MARKET, Cebu City (Disyembre 16, 2022) — Unsa kita ka andam sa pagsugat sa atong Ginoo?

Kini ang pangutana nga gipasupot ni Rev. Fr. Rizalino Jose B. Valles sa iyang pagpahigayon sa unang Misa de Gallo dinhi nga tinambongan mismo ni Mayor Mike Rama.

Ang mayor, nga wala gyuy sipyat sa pagtambong sa Misa de Gallo dinhi sa Carbon sukad masukad, niingon nga sa iyang bahin wala siya mahadlok nga kuhaon na sa Ginoo kay kahibawo siya giunsa niya ang iyang kinabuhi.

Fr. Valles. (PIO/Allan Cuizon)

“I will spend hell doing right and order. Akong ipahinumdom ninyo, I spend heaven doing right for you. Mao na atong buhaton. Pwede?” hagit niya sa mga nanambong sa Misa.

“Wala gyud ko nahadlok mamatay…. Mao ra na akong kinabuhi, pagtabang ra akong gihunahuna. I spend my heaven doing right,” dugang niya.

Ang Misa de Gallo kabahin sa “Carbon Pasko Na!” nga kalihokan nga gimugna ni Mayor Rama niadtong 2005 aron paghatod sab sa diwa sa Pasko sulod dinhi sa merkado.

Kini gituyo aron ang mga manindahay makatambong na niini, itandi sa wala pa ang kalihokan kay dili sila makabiya sa ilang mga pwesto. 

Si Maria Pino, presidente sa Cebu City United Vendors Association, niingon sab nga sa wala pa ang “Carbon Pasko Na!”, ang sige nga anaa sa hunahuna sa mga manindahay kay ang halin, nga dako sila og halin kay Pasko.

I will spend hell doing right and order. Akong ipahinumdom ninyo, I spend heaven doing right for you. Mao na atong buhaton. Pwede?

Mayor Mike Rama

Ingon niya, nga sa dihang gipatuman na ang kalihokan, nihatag kini og kahulogan alang sa mga manindahay sa ilang pagtamod sa kasaulogan sa Pasko.

Kaganihang kadlawon, gipahinumdom ni Fr. Valles ang kapamahinungdanon sa pag-andam sa kaugalingon alang sa Ginoo.

Ingon niya, dili sama kaniadto nga gamay ra ang nagpaabot sa Ginoo kay sa Iyang panahon buta pa sila, kita karon nakahibawo nga Siya mobalik alang kanato.

Panaad na ni Mayor Mike Rama nga dili gyud siya mosipyat sa pagsalmot sa tanang Misa de Gallo dinhi sa Carbon Public Market. (PIO/Allan Cuizon)

“Ang katawhna niadtong panahona were blind to what is essential to their existence. Buta ang mga katawhan niadtong mga panahona ug wala nila masabti unsay katuyoan sa atong kinabuhi. Mao na kita karon nangandam,” sulti ni Fr. Valles.

“Unsa man gayod ang atong kinabuhi dinhi sa kalibotan? The Lord is coming to us and we have to get ready for Him, to prepare ourselves. When Christmas arrives, our Lord should find…our soul fit to receive Him,” dugang niya.

Kini sab ang hagit ni Mayor Rama sa mga Sugboanon, nga andam sila sa pagtabang aron makab-ot ang gidamgo nga mahisusama sa Singapore ang atong dakbayan.

Si Maria Pino, labaw sa Cebu City United Vendors Association, sa maoy gisangonan sa pagpasiugda sa “Carbon Pasko Na!” nga kalihokan. (PIO/Allan Cuizon)

“Kay kung dili kita, kinsa man?” ingon sa mayor.

Kini nagkinahanglan og kausaban sa kaugalingon, sa paghangop sa saktong disiplina.

Kausaban sa kaugalingon sab ang punto nga gipasabot ni Fr. Valles.

Ang katawhna niadtong panahona were blind to what is essential to their existence. Buta ang mga katawhan niadtong mga panahona ug wala nila masabti unsay katuyoan sa atong kinabuhi. Mao na kita karon nangandam.

“Atong Panimalay atong gitagaan og nindot ng dekorasyon. Nangandam ta sa atong kaonon, nangandam ta sa atong suoton. Apan dunay usa ka importante nga butang—our Lord. Kinahanglan nga ang atong kalag andam nga modawat Kaniya…ang atong kasingkasing nga modawat Kaniya,” sulti ni Fr. Valles.

“We have to make adjustments to correct our lives…mga kausaban aron unta maandam kita…. Man’s existence is a constant preparing for God, who draws near every day,” dugang niya.  (PIO/rhm)