Ni Jinky Rosit
Senior Staff Member
MANILA (December 15, 2022) — Tabang gikan sa Aboitiz Equity Ventures (AEV) aron paghitsas sa ika-10 nga andana sa Cebu City Medical Center (CCMC).
Kini maoy nakuha ni Mayor Mike Rama sa lain na sab niyang pagbiyahe sa Manila pagka-Disyembre 13 ug 14 aron pagpangulitawo sa mga magpapatigayon sa kaulohan nga motabang sa Dakbayan sa Sugbo.
Gawas sa pasalig ni Sabin Aboitiz, chief operating officer sa AEV, kabahin sa CCMC, nagpakita sab siya og gusto sa pagpalambo sa bahin sa Barangay Ermita hain anaa ang kasamtangang planta sa Cebu Private Power Corporation, nga sangang kompanya sa AboitizPower.
Lakip sa nakadani kang Aboitiz mao ang pagbubo og puhonan sa South Road Properties (SRP).
Kauban ang iyang “Mayor’s Working Force”, gisugyot ni Mayor Rama kang Aboitiz sa ilang panagkita nga nga humanon ang ika-10 nga andana aron hingpit na kining magamit ug mapuslan sa mga kabus nga Sugbuanon aron makasinati sila og dekalidad nga serbisyo.
Bugti sa pagbuhat sa ingon ni Aboitiz mao ang katungod nga maoy mopangalan sa maong andana.
Kabahin sa Ermita, gisugyot ni Mayor Rama nga himuong usa ka parke ang luna ug ipangalan sa iladong sakop sa ilang pamilya nga si Don Ramon Aboitiz.
Nagpakita og dakong kaikag si Aboitiz sa tanang mga sugyot sa mayor ug nisaad nga maninguha nga moagni og mga negosyante gikan sa Amerika aron makatabang sa tanang programa ug proyekto sa dakbayan.
Lakip sa maong biyahe sa mayor ang pagbisita niya sa Federation of Filipino Chinese Chambers of Commerce and Industry Inc., nga iyang gihangyo nga motabang sa dakbayan pinaagi sa pagbubo og puhonan.
Iyang gipakita ngadto sa mga Insik na magpapatigayon ang programa sa dakbayan ug ang tinguha niini nga mahisusama sa Singapore.
Gihangop sa Chinese community ang mga plano, nga gikalipay sab ni Mayor Rama. #
Cebu City • News & Information 