Ni Rey Pasaporte
Staff Member

CEBU CITY (Disyembre 13, 2022) — Pasalamat ug pahimangno maoy gibiling mga pulong ni Mayor Mike Rama sa iyang paghapit sa Cebu City Sports Institute gym sa Barangay Sawang Calero karong adlawa atol sa gihimong general assembly sa mga sakop sa Cebu City Transportation Office (CCTO).

Pahimangno niya sa tanan nga dili gyud modawat sa bisan unsa, ilabina sa suborno nga kwarta, kay siya gani nga maoy mayor wa gyud sa iyang utok ang pagdawat og suborno bisan sa bata pa siya kay nagtubo man siya nga kugihan.

Gipaminaw ni Raquel Arce, labaw sa Cebu City Transportation Office, ang mga tugon ni Mayor Mike Rama atol sa sayo nga general assembly sa iyang buhatan, (PIO/Ruel Rosello)

Gipasalamatan sab niya silang tanan sa pagserbisyo lapas sa oras sa tingtrabaho, o nagtrabaho labaw pa sa gipangayo sa gobiyerno kanila.

Iyang gimando kang Raquel Arce, labaw sa CCTO, nga pun-an ang motrabaho 24 oras pito ka adlaw sa usa ka semana.

Gimando sab ni Mayor Rama nga kadtong mga anaa madestino sulod sa opisina mogawas gyud ug moatiman sa trapiko bisan kaduha lang sa usa ka semana.

Gipakita ni Mayor Mike Rama ang iyang kalendaryo alang sa tuig 2023 nga nagpakita kaniya kauban ang iyang pamilya nga sila si Malou, Atty. Mikel, Michelene, ug MJ atol sa general assembly sa Cebu City Transportation Office. (PIO/Ruel Rosello)

“Palihug assign tanan….  Enforcer, it doesn’t matter; parking aide, whatever. Tanan ta mo-render gyud ta og trabaho diha sa dan. Walay prima donna,” ingon niya.  

Gihimong sanglitanan ni Mayor Rama ang iyang kaugalingon nga wa siyay arte, kay  kaniadto sa bise mayor pa siya, nag-atiman siya sa dagan sa trapiko sa may Osmeña Boulevard.

Palihug assign tanan….  Enforcer, it doesn’t matter; parking aide, whatever. Tanan ta mo-render gyud ta og trabaho diha sa dan. Walay prima donna.

Mayor Mike Rama

Hangyo niya sa tanang enforcers nga tarongon ang ilang trabaho kay kung maagian niya nga nagkagubot ang dalan andam siyang manaog ug maoy momandar sa mga sakyanan.

“Kanang naa ko sa dalan, basta gwardiyahan lang ko, akoy mo traffic. Palihug, monaog na gani ko, mo-traffic, pasabot ana wa mamaayo ang sistema. Palihug do your job,” ingon niya.

Gusto ni Mayor Mike Rama nga ang tanang mga sakop sa Cebu City Transportation Office makasuway nga madestino sa dalan ug maoy momaniho paghapsay sa dagan sa trapiko. (PIO/File)

Iya sab nga gisugo si Arce nga kinahanglan ang tanan niyang mga sakop makasuway gyud nga madestino sa Carbon Public Market aron makakita sila sa dakong kausaban na sa dapit.

“Ang tanan ma-assign na gyud sa Carbon, unya kinahanglan ang tanang personnel. Dili moingon ‘dili ko maam mag-field. Ang tanan naa gyuy panahon or adlaw nga siya naa sa field, mag-enforcer. Ang admin mag-enforcer, dili kay ang enforcer ray naa sa dan,” sulti ni Arce isip balik-saysay sa gipamulong sa mayor. #

Gealon patabangon kang Koko sa trapiko