Ni Rey Pasaporte
Staff Member

CEBU CITY (Disyembre 13, 2022) – Gipasiugdahan sugod karong adlawa sa kagamhanan sa Dakbayan sa Sugbo ang duha ka adlaw nga “Cebu City Animal Welfare Summit”, nga tuyong gilusad aron mas kapanalipdan ang binuhing mga mananap batok sa pangabuso.

Gitumong ang kalihokan aron makakuha og mga sugyot ug matapok ang mga kabalaka, hagit, babag, ug mga isyu kabahin sa pagpanalipod sa mga mananap.

Si Bise Mayor Raymond Alvin N. Garcia maoy nangusog aron mahitabo gyud ang labing una sa nasud nga “Animal Welfare Summit”. (PIO/Ruel Rosello)

Niingon si Dr. Jessica Maribojoc, labaw sa Department of Veterinary Medicine and Fisheries (DVMF) sa kagamhanan sa dakbayan, nga tungod unya sa resulta sa maong panagtagbo, mas mapatuman na unya nila ang mga lihok kaayohan sa mga mananap

“Among our targets for this summit are to create sound policies, implementation, and the betterment of animal welfare. Isa sad ani maka-create ta og animal welfare desk in the future,” sulti niya.

Kauban niining aktoha ni Dr. Jessica Maribojoc, Cebu City veterinarian, ang mga pulis nga maoy gisangonan nga mahimong Animal Welfare Enforcement Officers (AWEO) sa Cebu City Police Office. (PIO/Ruel Rosello)

Matud ni Maribojoc nga ideya ni Bise Mayor Raymond Alvin N. Garcia, nga maoy chairman sa committee on animal welfare sa Konseho sa Dakbayan, nga adunay pagahimuong summit.

Ingon ni Maribojoc, ang summit maoy labing unang higayon tibuok nasud nga adunay usa ka lokal nga pangagamhanan nga nipasiugda og samang kalihokan.

Pormal nga gibuksan ni Bise Mayor Raymond Alvin N. Garcia (tunga) ang “Animal Welfare Summit” kauban sila si (wala padung tuo) City Veterinarian Jessica Maribojoc, Department of Agriculture-7 Regional Animal Welfare Coordinator Dr. Daniel Ventura Jr., City Councilor Joel Garganera, ug Ms. Kate Garcia. (PIO/Ruel Rosello)

“To cater sa atoang mga implementors sa animal welfare advocates, mga stakeholders nato regarding sa mga problema nato sa animal welfare ilabina dinhi sa Cebu City,” sulti niya dihang gipangutana kabahin sa katuyoan sa summit.

Ang summit nagdala sa tema nga “Changing Perspective on the Human-Animal Relationship.”  #