Ni Rey Pasaporte
Staff Member

LUSARAN, Cebu City (Disyembre 9, 2022) —  Adunay mga bata nga may apan sa ilang panglawas nga wala gyud maka-ta sa kinapusoran sa dakbayan kay lagi anaa sila nagpuyo sa kabukiran.

Gani, kining mga bataa wala gyud maapil sa lokal nga pangagamhanan sa Children’s Month niadtong niaging buwan tungod kay layo ang ilang nahimutangan.

Jocelyn Llesol. (PIO/File)

Kaganihang buntag, 150 ka batang Person with Disability (PWD) nga nagpuyo sa walo ka bukirang mga barangay sa dakbayan ang gitapok sa gyum dinhi aron hatagan og pinaskohan.

Sila naggikan sa mga barangay sa Adlaon, Cambinocot, Guba, Lusaran, Mabini, Paril, Tabunan, ug Tagbao.

Matud ni Jocelyn Llesol, presidente sa Cebu City PWD Federation ubos sa buhatan sa Department of Social Welfare and Services (DSWS), tuyo nga gimugna ang “Hudyaka sa Bukid sa mga PWD” aron sab makabati sa kalipay sa Pasko ang mga bata nga PWD sa bukid.

Gimugna kini sa kanhi labaw sa federation nga si Jojo Pimentel ug ilang gipadayon. Ug kay lagi naay PWD nga dili makalugsong sa patag, ilang giadto ang bukid aron modalit og kalingawan ug pinaskohan sa mga bata.

“Among paningkamotan sa sunod tuig, lain na sab nga cluster barangays amoang maalagaran sa among federation,” pulong ni Llesol.

Among paningkamotan sa sunod tuig, lain na sab nga cluster barangays amoang maalagaran sa among federation.

Jocelyn Llesol

“Ang bata gud nga PWD wala gyud maapil sa Children’s Congress. Nasakitan ko ba kay gamay ra ang kalipay sa mga PWD, mao na amo lang gisaka dinhi. Manghinaot ko nga ugma opening sa ‘Pasko sa Uptown’ maayo unta among gipangandoy nga maapil atong mga PWD didto sa ubos,” dugang niya.

Gitakda nga sobra sa 4,000 ka mga bata gikan sa 80 ka mga barangay sa dakbayan ang hatagan og pinaskohan sa mga tigpasiugda sa “Pasko sa Uptown” adto sa Cebu City Sports Center.

Gipaapil ang mga batang PWD sa lingaw nga mga duwa nga kay kaubang mga premyo atol sa kalihokan sa Barangay Lusaran. (PIO/Allan Cuizon)

Sa kalihokan karon, nagpatabang sila si Llesol sa Junior Jaycees Incorporated, nga nanghatag og mga duwaan.

Aduna say mga dagkong kompanya nga adunay gitunol sa aron ipalit og pagkaon ug mga school supplies nga ilang gipanghatag.

Si Kongresista Rachel Marguerite del Mar sa Amihanang Distrito sa dakbayan nihatag pud og 100 ka mga pinutos alang sa mga kabataangn PWD. #