Ni Rey Pasaporte
Staff Member

CEBU CITY (Dec. 9, 2022) — Libreng serbisyo nga dalit sa mga buhatan sa kagamhanan sa dakbayan sa programa niini nga “City Hall at Your Doorstep” ang napahimuslan sa mga taga-barangay Luz karong adlawa.

Thelma Bolotano. (PIO/Allan Cuizon)

Lakip kanila si Thelma Bolotono,61, nga gikuyogan sa iyang anak nga babaye sa pagduol sa lamesa sa Office of the Senior Citizens Affairs (OSCA).

Ingon niya, gipangayoan siya og bag-ong voter’s certification gikan sa Commission on Elections, certification sa barangay, ug bag-ong ID sa senior citizen hain ipahatod niya sa buhatan sa OSCA.

Kun iya nang mahatag ang mga requirements kinahanglan pa siyang mo-apply sa OSCA aron mahimo siya nga kwalipikado nga senior citizen sa dakbayan ug makadawat sa financial assistance.

“Akong bana nakakuha na kadaghan (sa financial assistance),” sulti ni lola Thelma.

Juliet Torcino. (PIO/Allan Cuizon)

Matud sa OSCA, sagad moduol mga senior citizen nga magpausab sa ilang mga ID kay halos dili na maklaro ang ilang mga dagway gumikan sa kadaan na.

Laing taga-barangay Luz nga nakadawat og libreng serbisyo mao si Juliet Torcino, 59, nga nagpaibot sa iyang ngipon kinuyogan sa iyang anak kay mahadlok siya og dagom.

“Akong gipaibot kay ga-ngo na man. Mahadlok lang ko inig ana (tusok) sa injection (sa anesthesia),” pulong ni Torcino.

Human giibot ang iyang ngipon, gihatagan siya’g tambal lakip na ang vitamins.

Usa ka lumolupyo nagpahiling sa doktor nga espesyalista kabahin sa iyang kahimtang sa panglawas atold sa City Hall at Your Doorstep sa Barangay Luz. (PIO/Allan Cuizon)

Nabantayan hinuon nga itandi sa ubang mga barangay, gamay lang ang nipahimulos nga mga lumolupyo kay lagi sige ang bunok sa uwan.

Ang City Hall at Your Doorstep usa ka programa sa administrasyon ni Mayor Mike Rama ug Bise Mayor Raymond Alvin N. Garcia nga dad-on ang serbisyo sa 27 ka mga departamento sa kagamhanan nga libre diha mismo sa mga barangay.

Aduna say libreng tupi atol sa City Hall at Your Doorstep. (PIO/Allan Cuizon)

Kini gituyo aron kadtong mga lumolupyo nga maglisod o dili gyud makaanhi sa sentro sa dakbayan, ilabi na kadtong anaa sa bukirang mga barangay, makatagamtam sa serbisyo sa kagamhanan.

Gawas sa mga departamento sa City Hall, niabag sab ang ubang mga organisasyon ug nasudnong mga buhatan sa gobiyerno, sama sa Cebu City Police Office (alang sa mga maglukat og police clearance), National Bureau of Investigation alang sa clearance, Integrated Bar of the Philippines-Cebu City Chapter, ug Philippines Statistics Authority alang sa National ID.

Karong buwana, Mahitabo ang sunod nga City Hall at Your Doorstep sa mga barangay sa Hiprodomo (Disyembre 16) ug sa Cogon Pardo (Disyembre 22). #

City Hall at Your Doorstep: Bringing service closer to the people