Ni Rey Pasaporte
Staff Member

Cebu city (Disyembre 6, 2022) — Kasingkasing nga alang sa pangalagad.

Kini ang tambag ni Mayor Mike Rama nga hambinon sa mga planning officers sa mga kalungsoran ug kasiyudaran tibuok nasud.

Si Mayor Mike Rama samtang namulong atubangan sa mga planning and development officers tibuok nasud alang sa ilang 32nd national convention. (PIO/Allan Cuizon)

Gisulti niya kini atol sa duha ka adlaw nga 32nd national convention sa League of Local Planning and Development Coordinators of the Philippines Incorporated (LLPDCPI) nga gipahigayon dinhi sa Dakbayan sa Sugbo ug gibuksan karong adlawa.

Ingon niya, kinahanglan adunay kasingkasing sa pagpangalagad kay kung pulos lang sulti apan kuwang ang gipakitang buhat ang resulta niini mao ang bati ug dili maayo nga serbisyo ngadto sa katawhan.

“If you want to be smart, resilient, sustainable, first you’ve got to have a heart. Words are not enough, action is what we need. Many can talk well but are dismal in output,” pulong ni Mayor Rama.

If you want to be smart, resilient, sustainable, first you’ve got to have a heart. Words are not enough, action is what we need. Many can talk well but are dismal in output.

Mayor Mike Rama

Gipasalamatan niya ang mga nagpasiugda sa kalihokan tungod sa pagpili sa Dakbayan sa Sugbo nga maoy pagahimoan niini.  Niadto pang 2014 ang katapusang national convention sa LLPDCPI nga gipahigayon dinhi sa dakbayan, kanus-a anaa si Mayor Rama sa iyang ikaduhang termino isip mayor.

Ubay-ubay gyud nga mga planning and development nga officers gikan sa lainlaing mga bahin sa nasud ang mitambong sa gipahigayon nga duha ka adlaw nga summit. (PIO/Allan Cuizon)

Ang duha ka adlaw nga kalihokan, nga gipahigayon sa IEC Convention Center Cebu may tema nga “Planning for Sustainable, Resilient and Smart Communities for the New Normal”.

Lakip sa nitambong sa convention mao si Architect Michael Joseph “Yumi” Espina, nga maoy City Planning and Development Officer sa City Hall.

Isip development and planning officer sa City Hall, mitambong si Architect Yumi Espina sa pagbukas sa 32nd national convention sa League of Local Planning and Development Coordinators of the Philippines.

“You have a position of influence. Do not waste it, make a difference in your localities,” awhag ni Mayor Rama sa mga nanambong.

Gidapit sab niya silang tanan sa pagbalik sunod buwan ug mosaksi sa pagbalik sa Sinulog Grand Parade, nga ipahigayon sa ikatulong Domingo sa Enero sa South Road Properties.  #

Mayor Rama: Be a hero, do what is right