Ni Rey Pasaporte 
PIO Reporter

CITY HALL, Cebu City (Nob. 29, 2022) — Kung nakaagi kamo sa V. Rama niining dakbayan unya nakakita sa mga parol nga nagdayan-dayan sa maong dalan ug nakatuaw nga “kanindot ba”, pasalamati ang mga children in conflict with the law (CICL) sa Operation Second Chance sa kagamhanan diha sa Barangay Kalunasan.  

Matud ni Dr. Ester Concha, labaw sa Operation Second Chance ug sa Department of Social Welfare and Services (DSWS), ang mga bata maoy nihimo sa mga parol unya ang City Hall maoy nanaud sa mga suga niini. 

Dr. Ester Concha. (PIO/Allan Cuizon)

Ingon niya, ang mga CICL ang nihimo sa mga parol makamao sila daan ug nagpakita og interes, maong sila nalang ang nibuhat, nga nagustohan sab sa DSWS kay makatabang sab sila sa mga bata.

“Duna may motudlo nila. So, at least ma-enhance ilang kahibalo unya puhon basin og mogawas na sila sa atoang Second Chance pwede na sila makatrabaho og parol inigka-Pasko adto sa ila,” pasabot ni Concha

“Ika-27 ka tuig na ni nga proyekto sa atong Mayor Mike Rama.  There was a time kuan man ni siya project sa Rotary Club of Cebu-Guadalupe ug sa Atong siyudad sa Sugbo ug sa Buhing Pasko Association,”sulti niya.

Karong adlaw, gipangulohan ni Mayor Mike Rama ang pagbukas sa “Pasko sa V. Rama”, nga gipahigayon sa Executive Building Social Hall sa City Hall.

Duna may motudlo nila. So, at least ma-enhance ilang kahibalo unya puhon basin og mogawas na sila sa atoang Second Chance pwede na sila makatrabaho og parol inigka-Pasko adto sa ila.

Dr. Ester Concha, labaw sa Operation Second Chance ug sa Department of Social Welfare and Services (DSWS)

Kauban niya si Dr. Concha, project director sa Pasko sa V. Rama, atol sa kalihokan, hain gipahibawo ang inidigay sa hinimo nga Belen ug parol, nga gipangdayandayan sa dalan V. Rama sugod sa Barangay Guadalupe lahos sa Barangay Calamba ngadto na sa Pahina San Nicolas Proper niining dakbayan.

Niabot na sa 27 ka mga tuig ang Pasko sa V. Rama nga gimugna ni Mayor Rama.

“Looking at the whole historical perspective, kung naa mo sa akong sitwasyon, ang ako gyud pirme isulti noh? Pasalamat sa Ginoo,” ingon ni Rama.

Gipangulohan ni Mayor Mike Rama ang paglusad sa Pasko sa V. Rama atol sa press conference nga gipahigayon sa Social Hall sa Legislative Building sa City Hall. (PIO/Allan Cuizon)

Iya nang gitugyan ang Pasko sa V. Rama sa mga nagdumala karon, kay lagi usa nalang siya ka mensahero niini.

“Ang Pasko sa V. Rama kamo na, dili na ako. Uyon pa gani mo ana, fight for it…. Kinsa man mo-fight sa Pasko sa V. Rama? Ang mga nag-umol ilabina kita kung buhi pa,” pulong sa mayor.

Magpahigayon unya ang mga tagdumala sa kalihokan ug usa ka parade nga apilan sa tulo ka mga barangay sugod sa dalan B. Aranas ngadto na sa Espina Compound.  

Lahi ra lantawon ang dalan kung kini gidayandayanan og parol kay lagi Pasko na sa atong dakbayan. (PIO/Allan Cuizon)

Sumala ni Dr. Concha, gawas sa contest sa Belen ug sa parol, aduna say indigay sa pinakahayag nga mga establisemento nga nahimutang sa V. Rama.

Ang premyo sa Belen Contest kay P20,000 sa mananaug; P15,00 sa ikaduhang ganti; P10,000, ikatulong ganti; P7,000, ikaupat nga ganti; P5,000, ikalimang ganti. Aduna say P1,000 isip consolation nga premyo.

Ang indigay sab sa parol nagdala sa P15,000 nga ganti alang sa mananaug; P10,000 isip ikaduhang ganti; P5,000 sa ikatulong ganti; P3,000 isip ikaupat nga ganti; P2,000 sa ikalima; ug P1,000 isip consolation nga premyo. #

Mananaug sa ‘Pasko sa V. Rama’ gipahalipayan