Ni Renato B. Pasaporte
PIO Staff Member
CEBU CITY (Dec. 1, 2022) – Sa kataposan, aduna na’y buhatan ang Liga ng mga Barangay (LnB), kon Association of Barangay Captains (ABC), nga may 80 ka mga ginsakopan ni’ng dakbayan.
Pormal nga gibuksan karong buntag ang opisina nga anaa mahimutang sa ikatulong ang-ang sa edipisyong gigamit ron ug mas naila nga buhatan sa City Treasurer’s Office (CTO).
Dul-an sa usa ka tuig nga walay klarong buhatan ang ABC human naguba sa pagkuso-kuso sa makusog nga bagyong Odette ang kanhi niining buhatan sa didto sa South Road Properties (SRP) sa miaging tuig.
Gipahiyaon una ang santos nga misa nga gisaulog ni Msgr. Camilo Alia nga gitambongan nilang Mayor Mike Rama, Bise Mayor Raymond Alvin Garcia, ang duha ka kongresista sa dakbayan nga sila si Eduardo Rama, Jr. ug Rachel Marguerite “Cutie” del Mar.
Diha sab ang pipila ka mga konsehal sa dakbayan ug ubay-ubay nga mga kapitan.
Matod ni Konsehal Franklin Ong, pangulo sa ABC, mitinguha na ang board of directors, nga gamiton ug mopahiluna ni’ng maong dapit sa CTO building sa wala pa ang Disyembre 2021 sa dihang mikusokuso si Odette sa Sugbo.
Daan na’ng gitiman-an ni kanhi Presidente Gloria Macapagal Arroyo sa tuig 2004 ang Presidential Proclamation No. 660 nga nagahin alang sa himoong buhatan sa local nga ABC nga mao ni karon ang edepisyo sa CTO.
Gibutyag ni Ong nga usa siya sa miplano uban sa Department of Interior and Local Government (DILG) Cebu City kung asa sila sa ABC mag-opisina ug ingon man ang Sangguninga Kabataan (SK) Federation diha sa CTO building.
Pag-igo sa pandemya, siya midugang, mitugot ang ABC nga gamiton ang ilang espasyo alang sa Emergency Operation Center (EOC).
Apan, sa dihang midumala ni Konsehal Joel Garganera sa EOC, nakakaplag siya og laing dapit, ang kanhi campus sa Sacred Heart School for Boys sa may Gen. Maxilom Ave., nga mas luag alang sa kalihukan sa EOC.
Mipalabang gilayon og resolusyon ang LnB board nga kauhaon ug angkonon og balik sa espasyo sa CTO, apan wala kini matagad sa nangagamhanan pa niadtong tungora, siya miingon.
Natuman ra ang LnB resolution sa ikatulong kwarto ni’ng tuiga human nanumpa si Rama isip piniling Mayor.
“Mayor Rama adhered to our claim and approved our request to use the third floor as our ABC Office,” pulong ni Ong.
Gipasalamatan niya si Rama sa hugot nga suporta sa liga un sa tanang mga sakop niini dinhi sa dakbayan.
“Finally, we have a spacious place that is convenient and more accessible to the city’s barangays,” siya mipahayag.
“Mayor Rama adhered to our claim and approved our request to use the third floor as our ABC Office. Finally, we have a spacious place that is convenient and more accessible to the city’s barangays.”
Konsehal Franklin Ong, pangulo sa ABC
Gipasalamatan sab niya ang tanan niyang mga kaubanang kapitan sa ilang suporta hain ang pondo nga gigamit sa pagpatrabaho sa iling buhatan gikan man sa pondo sa liga.
“Atoa kini mga kaigsuonan, bunga sa atong paningkamot ug kalig-on sa panerbisyo nato. Naa gyud ta’y opisina nga mas accessible, di na gyud layo ituyok sa SRP, duol na gyud sa City Hall,” mipamulong ni Ong.
“Ang tanan nga inyong iparayeg sa atong Mayor ug sa atong Konseho, padung diri og labang na gyud didto. So, dako kaayo ta’g kalipay nga naa ta diri,” siya midugang.
Ang bag-ong buhatan sa ABC dunay social hall nga magamit sa dinaghang panagtigom, mga training ug ubang mga kalihokan.
Masaligon si Ong nga mas paspas na ang ilang serbisyo sa katawhan sa suporta ni Mayor Rama, ilabina sa iyang panglantaw nga Singapore-like Cebu City.
Sa iyang bahin, si Rama niingon nga kanunay niya’ng gibalik-balik sa pagpahinumdom sa iyang mga kaubanan nga dili mohunong sa tiunay nga panerbisyo kay magpabilin kini sa hunahuna ug kasingkasing sa mga tawo.
Iyang tambag sa mga opisyales sa barangay nga dili magsigi og away politika kay himoon ra silang kataw-anan sa mga tawo sa ilang barangay kay nag-away bisa’g layo pa ang piniliay. # (PIO/RBPasaporte)
Cebu City • News & Information 