Mga kawani gidasig nga magpagamay, aron mas himsug

Ni Renato B. Pasapaorte
^{PIO Reporter}

CITY HALL, Cebu City (Nov. 14, 2022) – Gidasig ni Mayor Mike Rama ang mga kawani sa dakbayan nga tagdon ug tutokan ang pag-alima sa ilang kahimsug samtang nangalagad sa katilingban.

Giawhag niya sila sa iyang mensahe human sa flag ceremony dinhi karong buntag nga dili magpalabi sa pagpadagko sa ilang lawas aron epektibo sa ilang pagpanrabaho.

Gani tambag niya niadtong pipila nga ubanan sa ehersisyo matag adlaw kay posibling moabot ang panahon nga duna siya’y ipahigayon nga contest nga magsugod karong buwan sa Disyembre ni’ng kasamtangan nga tuig.

“The size of your stomach reflects your discipline,” pulong ni Rama.

Apan sa dili pa sugdan ang contest, magsinukdanay usa sa mga hawakan ug timbang ug pirmahan ang kasabotan nga mas mohimsug na unya inig saulog unya sa nasugdong kagawasan karong Hunyo 12, 2023.

Gihatagan niya ang tanan og pito ka buwan sa pagpagamay sa ilang lawas.

Alang kaniya, igo na kaayo ug makiangayon ang gihatag nga pito ka buwan nga magpagamay sa lawas sa sa mga kawani, gawas kung dunay rekomendasyon sa doktor nga magdili.

“The size of your stomach reflects your discipline.”

Mayor Mike Rama

Apan dili siya motuo nga aduna’y doktor mosugyot nga ipabilin ang gidak-on sa lawas. Tuyo niya nga paubanon sa iyang mga walk-through ang mga kawani sa City Hall.

“Message for today, we are serious we will have the belly measurement contest until Independence Day. Katong mga ma-sexy na, ipaapil sa Independence Ball,” sulti ni Rama.

Nakuratan sa Alma Liza Menancillo, kawani sa Mayor’s Office, sa gipamahayag ni Rama. “Na timing ra ba nga naa gyud ko dapit sa atubangan,” siya mipadayag.

Apan siya midugang, “pero nindot nga mag-palista og moapil kay para ra man pod sa atong kaayuhan ang kaning contest.”

(PIO/ReyPas/MCB Pineda)