CEBU CITY (Nov. 10, 2022) — Sa paglusad sa kagamhanan sa “Balik Eskwela PabakunaTa ExtraBonanza”, padayong giawhag ang mga dagko, ilabi na ang mga ginikanan ug mga guardian sa mga bata, nga magpabakuna gyud batok sa CoViD-19.
“Dili lang si inday ug si dodong, ang angayang bakunahan. Tanang categories dapat bakunado para tanan protekado,” pulong ni Dr. Daisy Villa, labaw sa City Health Department (CHD).
Pulong niya, bonus nalang unya nga adunay kahigayonan ang mga bata nga makadaug sa raffle, hain magrasyahan sab ang ilang mga ginikanan o mga guardian.
Gipadayag kini ni Dr. Villa atol sa programang “Panaghisgot” nga gipahigayon sa City Hall Social Hall ilawom sa Public Information Office.
Kauban niya sa gihimong hisgotanay sila si Melissa dela Cruz, project lead sa Balik Eskwela Program; ug si Sem Anthony Bael, CoViD-19 alternate focal person sa Department of Education (DepEd)-Cebu City Schools Division.
Ang programa sa pagpamakuna sa CDH naggrupo sa mga tawo ngadto sa singko hangtod 11 anyos, 12 hangtud 17 anyos, ug ang mga “adult” o kadtong mga hingkod na lakip ang mga senior citizens.
Dili lang si inday ug si dodong, ang angayang bakunahan. Tanang categories dapat bakunado para tanan protekado.
Dr. Daisy Villa, City Health Officer
Gibutyag ni Bael nga sa 180,000 ka mga tinun-an sa pampublikong mga tunghaan sa elementarya ug high school sa dakbayan, anaa pa lang sa kapin 100,000 ang bakunado na.
Sa katuyoan mga mabakunahan gyud ang tanan, gilusad sa kagamhanan, ilawom sa pagtukmod ni Mayor Mike Rama ug Raymond Alvin N. Garcia, nga molusad og laing pa-raffle hain ang mga kabataan maoy mahimong mananaug.
Kahinumdoman nga moabot sa P4.9 milyones nga balor sa mga premyo, lakip ang usa ka house and lot ug usa ka awto, ang gipang-apud-apod sa kagamhanan sa pa-raffle alang sa nakakumpleto sa ilang bakuna nga mga dagko na niadtong Pebrero 24, 2022, ang ika-85 nga Charter Day sa dakbayan.
Karong umaabot nga ika-86 nga Charter Day ipahigayon ang pa-raffle sa “Balik Eskwela PabakunaTa ExtraBonanza”, hain ang bakunadong mga kabataan, o kadtong nag-edad og singko ngadto sa 17, ang makaangkon sa kahigayonan nga makadaug.
Pulong ni Dela Cruz, kini ang hinungdan nganong gilusad sa kagamhanan ang programa, kay aron pag-ingganyo gyud sa mga kabataan nga magpabakuna, kay gawas nga mas protektado sila batok sa CoViD, aduna pa gyud silay kahigayonan nga makadaug.
Sa pagkakaron, ang mga premyo mao ang appliances, mga himan sa eskuylhan sama sa tablet, mga motorsiklo, usa ka sakyanan, ug duha ka units sa Deca Homes.
Apan gibutyag ni Dela Cruz nga wala pa nakontento si Mayor Rama sa mga premyo ug nga gusto pa niini nga pun-an kini.
Niingon sab siya nga gawas sa kabataan, ang ginikanan o ang guardian sa makadaug nga bata aduna say madawat nga premyo.
Bag-o lang nahuman ang CHD, Local School Board, ug mga kaubang buhatan sa pagpahigayon ug information campaign mahitungod sa “Balik Eskwela PabakunaTa ExtraBonanza” sa 70 ka mga eskuylahan.
Nagsugod na sab ang pagpahigayon mismo sa pagpamakuna sulod sa mga eskuylahan dili lang alang sa mga tinun-an kundili lakip na sab ang mga maestra, ginikanan, guardian. (PIO/rhm)
Cebu City • News & Information 