Kaugalingong ihawan sa dakbayan lihokon

Ni Rey Pasaporte
PIO Reporter

PLAZA SUGBO, Cebu City (Oktubre 18, 2022) — Paningkamotan ni Konsehal Pastor Alcover, Jr., chairman sa Committee on Agriculture sa Konseho sa Dakbayan, nga makabaton ang dakbayan og kaugalingon niini nga slaughterhouse o ihawan.

Kini ang iyang gipasalig human nga iyang nasayran nga adunay mga ihawan dinhi sa dakbayan apan gidumala sa pribadong mga kompanya.

“Karon pako kahibalo wa diay ‘tay slaughterhouse. Atong paningkamotan makahimo ta og Cebu City nga official gyud nga slaughterhouse,” ingon niya.

Si Alcover usa sa namulong atol sa “Meat Safety Consciousness Week” nga gipahigayon kagahapon sa buntag sa Department of Veterinary Medicine and Fisheries (DVMF) ug sa National Meat Inspection Service (NMIS).

Atong paningkamotan makahimo ta og Cebu City nga official gyud nga slaughterhouse.

Konsehal Pastor Alcover, Jr.

Si Dr. Jessica Maribojoc, labaw sa DVMF, niingon nga kada-tuig ning gisaulog ang meat consciousness week hain kada adlaw dunay kalihokan aron mas makahibawo ang mga Sugboanon kabahin sa karne nga ilang gikaon nga kini luwas ug layo nga may makatakod nga sakit.

“Dinha mosulod ang mga meat inspectors nato.  Kita mo-inspect sa karne kung safe ba siya kan-on nato. Mao nay mandate nato sa Cebu City,” ingon niya.

“Dapat kabalo ta unsaon pag-promote about meat hygiene. Kay kung kabalo man gud ta pag-handle sa meat is safe, off course ang atong gipakaon sa kunsumidor is safe sad sila, kay naa man guy mga sakit maka-cause og infection,” dugang ni Dr. Maribojoc.

Sa iyang bahin, nisulti si Bise Mayor Raymond Alvin N. Garcia atol sa iynag pagpamulong nga ang kasaulogan ngapahinumdom kanato nga dili lang kay masayod kita sa labing maayo ug sa gidilli apan nagpahinumdom sab kini sa atong kaugalingon nga ang atong kaonon matag adlaw nakahibawo kita nga luwas ug limpyo.

Iyang gipasalamatan ang DVMF sa malampuson niining pagpahigayon sa kalihokan.

Sa iyang bahin, nidayeg si Dr. Roberto Umali, NMIS regional director, sa kakugi sa mga beterinaryo ug meat inspectors kay napugngan ang ilegal nga pagpang-ihaw sa mga karneng baboy, baka ug manok dinhi sa dakbayan.

Iyaang gipaniguro nga luwas kaonon ang mga karne dinhi kay ang mga negusyante sa mga karneng baboy og manok ug uban pa binantayan ang tanan sa ilang buhatan.

“Pag sinabi po accredited ka ng double AA, meaning you can transport your products outside Cebu, anywhere in the Philippines, while may mga planta po tayo dito na triple A. Ibig sabihin po ‘pang domestic and pang international,” pulong ni Dr. Umali. #