Ni Rey Pasaporte
PIO Reporter

INAYAWAN, Cebu City (Oktubre 18, 2022) — Hain ang mga bakhaw sa baba sa sapa sa Bulacao?

Kini ang tan-awon sa kagamhanan sa dakbayan human nasuta sa gihimong pakisusi kagahapon ni ni Atty. Gerry Carillo, labaw sa Cebu City Disaster Risk Reduction and Management Council, ug ni Engr. Guillermo Viola sa Department of Engineering and Public Works, nga napuo na kini.

Engr. Guillermo Diola. (PIO/Allan Defensor)

Nahimo nilang pangutana mao nga nganong nahawan man ang mga bakhaw ug si kinsa man ang naghatag og pagtugot nga unta gipanalipdan man sa balaod ang bakhawan nga dili hilabtan?

Giingon nga yuta nga asa kaniadto ang mga bakhaw gipanag-iya na og pribadong negosyante.

Pulong ni Engr. Viola, tan-awonon kini kay unta protektado man ang bakhawan ubos sa Department of Environment and Natural Resources (DENR)-7.

Nakahinumdom pa siya nga dunay proyekto nga ilang gihimo  kaniadto sa sapa apan gihunong nila kay dili mosugot ang DENR nga panguhaon ang naglinya nga mga bakhaw nga maigo sa ilang proyekto.

“Tan-awon natong baba. Nagsugod na baya ta sa three-meter easement sa Bulacao. Mao niy tumoy sa Bulacao River. Karon nahibulong nalang ta na-reclaim na man,” ingon niya.

Gisusi ni Atty. Gerry Carillo (nag-jacket), labaw sa Cebu City Disaster Risk Reduction and Management Council, ug mga taga-Department of Engineering and Public Works and lutsanan sa sapa sa Bulacao. (PIO/Allan Defensor)

“Asa na man ang mga bakhaw diha? Mao nay naka-cause nato og undang (sa proyekto) kay tungod sa bakhaw dili pahilabtan. Dili man mosugot ang DENR. Ang atong CCENRO (Cebu City Environment and Natural Resources Office) sad dili pahilabtan ang bakhaw,” dugang niya.

Sumala ni Viola, ang sapa kaniadto kutob lamang sa may bodega nga gipanag-iya sa kanhi kapitan ug ang tubig modagayday lang paingon sa bakhawan hinungdan nga ila kining gisumpayan ang sapa apan wala na sila makalahos gumikan kay dili man mahilabtan ang mga bakhaw.

Asa na man ang mga bakhaw diha? Mao nay naka-cause nato og undang (sa proyekto) kay tungod sa bakhaw dili pahilabtan. Dili man mosugot ang DENR. Ang atong CCENRO (Cebu City Environment and Natural Resources Office) sad dili pahilabtan ang bakhaw.

Engr. Guillermo Diola, DEPW

“Suong-suong mi diha puros pa na bakhaw.  Inigsangit sa imong sanina lukso-lukso gyud ka (sa kasakit). Pwerte mang haita,” ingon niya.

Iduso ni Atty. Carillo ug Engr. Viola ang ilang taho kabahin sa nahanaw nga mga bakhaw ngadto kang kanhi Environment Secretary Roy Cimatu sa sunod nilang tigom sa Task Force Gubat sa Baha. #