Ni Rey Pasaporte
PIO Reporter

TAPTAP, Cebu City (Oktubre 15, 2022) — Gipasalig ni Mayor Mike Rama karong adlawa nga padayon siya nga nangita og paagi alang sa kasulbaran sa kahimtang sa dul-an 200 ka mga pamilya sa lot 937 sa Sitio San Miguel, Apas, Cebu City nga may nag-ung-ong nga demolition.

Ingon niya, dili siya gusto nga yatakan ang katungod sa mga kabus nga namuyo sa maong lugar.

Subling gisulti ni Mayor Mike Rama nga ang iyang kasingkasing anaa sa mga kabus ug nga pakamatyan niya ang pagpanalipod sa ilang mga katungod. (PIO/Allan Cuizon)

“Usa ra gyud ang katuyoan nako, dili ko gusto tumban ang mga kabus. Dili ko gusto ana. Maypa mamatay ko defending (them).  Kana bitaw moingon ko ninyo ‘make the lives of the poor better, the middle class comfortable, and the rich to share’,” sulti sa mayor atol sa gipahigayong tree-planting sa Barangay Taptap karong adlawa.

Nasayran nga didto na ang demolition team niadtong Huwebes, Oktubre 13, sa dapit aron ipatuman ang mando sa hukmanan sa pagpahawa sa mga lumolupyo, nga ang baroganan mao nga ang gobiyerno sa nasud ang tag-iya sa yuta ug nga aduna pay kaso kabahin niini sa laing sala sa korte.

Usa ra gyud ang katuyoan nako, dili ko gusto tumban ang mga kabus. Dili ko gusto ana. Maypa mamatay ko defending (them).  Kana bitaw moingon ko ninyo ‘make the lives of the poor better, the middle class comfortable, and the rich to share’.

Mayor Mike Rama

Apan si Mayor Rama, si Bise Mayor Raymond Alvin N. Garcia, ug si Kosehal Edgardo “Jaypee” Labella II nakigsabot tali sa sheriff ug sa nangangkon nga tag-iya sa yuta nga hatagan og lugway ang mga pamilya ug duha ka semana.

Pulong ni Mayor Rama, nagpapili siya nga may prinsipyo ug nakahibawo niini ang Labaw nga Makagagahom kay nagtubo siya nga nagserbisyo sa Ginoo ug sa simbahan.

Ang argumento sa mga taga-Sitio San Miguel, Barangay Apas nganong supak sila sa pagguba sa ilang mga balay nga ilang gibarogan nga anaa mahimutang sa luna nga gipanag-iya sa nasudnong pangagamhanan. (Tampo nga hulagway)

“Ako silang giistoryahan, abogado ko, kanang mga ingon ana trabaho ko na, pero wa ko motrabaho og demolition nga maghilak ang tawo. Wala. Di ko gusto maghilak, di ko gusto dangoyngoy ana,” sulti sa mayor.

“Maypa ako nalang ang mamatay, kay ang mga tawo magdangoyngoy di ko gusto. Wala ko magpapili nga modapig ko sa dato, tumban ang katungod sa kinatibuk-an, sa daghang tawo, wala,” dugang niya. #

Ang nangabot nga mga pulis ug ang demolition team niadtong Oktubre 13, Huwebes, sa Sitio San Miguel, Barangay Apas. (Tampo nga hulagway)