Ni Rey Pasaporte
PIO Reporter

CEBU CITY (Oktubre 13, 2022) — Giawhag ni Mayor Mike Rama ug Bise Mayor Raymond Alvin N. Garcia ang mga developers sa nasud nga motabang sa kagamhanan sa dakbayan sa pagtukod og mga medium-rise building alang sa socialized housing housing sa siyudad. 

Gibuhat nila kinii atol sa panagtapok sa mga sakop sa Organization of Socialized and Economic Housing Developers of the Philippines (OSHDP) sa Cebu Country Club kagabii.

Si Mayor Mike Rama sa iyang pagpamulong atubangan sa mga sakop sa Organization of Socialized and Economic Housing Developers of the Philippines gabii niadtong Miyerkules, Oktubre 12, 2022. (PIO/Allan Defensor)

Niingon si Mayor Rama nga ang subling panagtigom sa grupo human niigo ang CoViD maoy naghatag og paglaom kaniya nga aduna pay laing mobarog nga MRB isip pagtuman sa developers sa socialized housing nga balaod, sama sa gihimo sa Cebu Landmasters, Inc. nga nagtukod og duha a MRB sa Barangay Lorega-San Miguel.

“You are the answer to our Medium-Rise Building need that we would like to be in place in the City of Cebu…and we need your help. Will you accept to be part of it?” sulti niya.

You are the answer to our Medium-Rise Building need that we would like to be in place in the City of Cebu…and we need your help. Will you accept to be part of it?

Mayor Mike Rama

Human siya gisanong sa mga nanambong sa tigom, iya sila gipapanumpa nga moduyog kaniya sa iyang gilantaw ug tinguha nga makab-ot sa iyang administrasyon ang damgo nga mahisusama sa Singapore ang dakbayan

Samtang sa iyang bahin, niingon si Bise Mayor Garcia kanila nga anhi sa dakbayan motukod sa ilang socialized housing ang mga developers pinaagi sa paghimo og MRBs tungod kay 90 porsiyento sa mga lumolupyo dinhi anaa sa urban nga bahin sa siyudad.

Bise Mayor Raymond Alvin N. Garcia. (PIO/Allan Defensor)

Ingon niya, dako kaayo og ikatabang ang pagsanong sa mga developers kay liboan ka mga pamilya nga naa sa urban walay klarong mga pinuy-anan ug dili ikalimod nga ang dakbayan nagkinahanglan gyud kanila.

Nidugang ang bise mayor nga nakita niya mismo ang suliran kay man maoy chairman sa Committee on Housing sa Konseho sa Dakbayan.

Usa sa iyang nakita mao nga may mga developers nga walay pakabana kabahin sa socialized housing nga bahin sa balaod sa ilang pagtukod og mga istruktura dinhi sa dakbayan.

“The developers go to Cebu City, look at it as a very lucrative place for them to build condominiums or subdivisions, and then they need not care where they will comply with their socialized housing aspect,” sulti ni Bise Mayor Garcia.  #