Ni Rey Pasaporte 
PIO Reporter

Kongresista Edu Rama. (PIO/File)

CEBU CITY (Oktubre 6, 2022) — Kapin sa 5,000 ka mga lomulupyo gikan sa 31 ka mga barangay niining dakbayan ang ipailawom sa orientation sulod niining semanaha kabahin sa “Tulong Panghanapbuhay sa Ating Disadvantaged/Displaced Workers” (TUPAD) nga programa nga gisugdan karong adlawa.

Si Kongresista Edu Rama sa habagatang distrito sa dakbayan maoy nangita’g paagi nga mahatud ang maong programa gikan sa nasudnong kagamhanan sa mga lumolupyo sa dakbayan.

Ang Tupad programa sa Department of Labor and Employment (DOLE) alang sa mga kabus nga nawad-an sa ilang panginabuhian sukad niigo ang CoViD niadtong Marso 2020.

“Kani isip tabang ni sa atong mga kaigsuonan nga mga Sugboanon nga naglisod. Dugay na ni siya nga programa para sa atong displaced workers. Mao niy tumong ug tinguha aning programaha. Ila ning trabahoan,” sulti ni Kongresista Rama.

Kani isip tabang ni sa atong mga kaigsuonan nga mga Sugboanon nga naglisod. Dugay na ni siya nga programa para sa atong displaced workers. Mao niy tumong ug tinguha aning programaha. Ila ning trabahoan.

Congressman Edu Rama

Ang kagamhanan sa dakbayan may susama sab nga programa nga gitawag nga Tabang Alang sa Panginabuhian sa Atong mga Trabahante (Tapat) nga alang gihapon sa mga nagkalisod sa panginabuhian.

“Ang Tapat sa una sa City lokal program to siya. Kaning Tupad is a national program,” ingon sa kongresista.

Karong adlawa, sa Buhisan adunay 183; Punta Princesa, 180; Basak Pardo, 128; Kinasang-an, 52; Bulacao, 519; Labangon, 335; Basak San Nicolas, 306; Cogon Pardo, 149; Inayawan, 80; Pasil, 109; Suba, 100; ug Tisa, 420, ang gipaubos sa orientation.

Ang Tupad usa ka programa sa nasudnong pangagamhanan ilawom sa DOLE nga maghatag og trabaho sulod sa napulo ka adlaw ngadto sa mga naglisod natong mga kaigsoonan aron sila makadawat og ayuda nga ilang hinagoan. (PIO/Allan Defensor)

Torno ugmang adlawa sa mga taga-Guadalupe, 959; Calamba, 41; Pahina San Nicolas, 50; Sawang Calero, 100; Kalunasan, 150; San Nicolas Proper, 351; Duljo Fatima, 150; Mambaling, 248; Quiot, 100; ug Sapangdaku, 70. 

Sa Sabado, ang mga giila ng beneficiaries sa Babag, 127; Bonbon, 50; Pamutan, 50; Pung-ol Sibugay, 50; Sudlon I, 50; Sudlon II, 25; Tabunan, 10; Tagbao, 20; ug Sinsin, 100 mao na usab ang mosinati sa orientation, o ang pagpaila kanila sa programa.

Sierra Mae Ermonda. (PIO/Allan Defensor)

Sumala ni Kongresista Rama, ang mga opisyal sa tagsatagsa ka mga barangay ang nitabang sa iyang buhatan ug niila sa mga makapahimulos sa Tupad.

Matud ni Sierra Mae Ermonda, representante sa DOLE-7, nakig-alayon ang ilang buhatan sa mga barangay, nga maoy nipahibawo sa Tupad ug niila sa mga beneficiaries.

Ilawom sa Tupad, 10 ka adlaw trabahoan sa mga beneficiaries ang programa sa upat ka oras kada adlawa hangtod mahuman ang 10 ka mga adlaw.

Sa tag-P435 ang adlaw, makakobra ang usa ka beneficiary og P4,035.

“Depende ra sa barangay unsay ilang ipa-trabaho sa 10 ka adlaw,” sulti ni Ermonda. #

24K PWDs, Tapat beneficiaries get cash aid