Ni Rey Pasaporte
PIO Reporter
CEBU CITY (Oktubre 5, 2022) — Sa nagpadayong paghatag og orientation sa mga iskolar sa dakbayan, gipahinumdoman sila nga aduna lamang silay usa sa semana nga kuhaon ang ilang allowance sa dili pa ibalik ang kwarto sa panudlanan sa kagamhanan og dili na dili madawat pa.
Kini ang pahimangno ni Geraldine Labay sa Cebu City College Scholarship Program, nga gipakighinabian sa Cebu City News atol sa gipahigayon nilang orientation karong adlawa sa Cebu City Sports Center.
Ingon niya, sa higayon nga ma-release na ang allowance sa mga iskolar, kinahanglan gyud nilang kuhaon kay kung dili nila makuha sulod sa usa ka semana matiway na ang maong kantidad.
“Iuli mana nato…ang kwarta gud kay kung dili sad na nato na iuli… ma-file-lan man sad og case ang City Hall ana. Gikan sa amo five days, five days sa CTO (City Treasurer’s Office, dayon after ana COA (Commission on Audit) na siya. Pero mag-announce gyud mi ana,” sulti ni Labay.
Iuli mana nato…ang kwarta gud kay kung dili sad na nato na iuli… ma-file-lan man sad og case ang City Hall ana. Gikan sa amo five days, five days sa CTO (City Treasurer’s Office, dayon after ana COA (Commission on Audit) na siya. Pero mag-announce gyud mi ana.
Geraldine Labay
Magpadayon ang orientation hangtud pa sa Oktubre 11. Katuyoan niini mao nga ang mga iskolar, ilabi na kadtong maoy pagsulod sa first year sa kolehiyo, masuhito kabahin sa pamaagi sa kabahin sa paghatag sa allowance.
Sagad sa hinungdan nganong dili makuha ang allowance gikan sa kagamhanan mao nga wa masayod ang mga tinun-an nga ipanghatag na diay kini.
“Ang uban mo-bash dayon sa Facebook kay nganong wa sila na-update. Kana tungod kay wala silay follow-up sa ilang scholar coordinator by school. Ang uban morason naa sila sa bukid, nga wa daw silay internet,” ingon ni Labay.
“Amo gyud silang gi advise-san nga mo-follow up gyud sila sa ilang scholar coordinator every school kung naa na ba ilang allowance,” dugang niya.
Matud ni Labay, ang paghatag sa allowance, lakip ang pahibawo unsa nga eskuylahan, anha nila ipahibawo sa CCCSP “Scholar Page”.
Nidugang siya nga kung maghikutar lang gyud sa pag-follow up ang tinun-an makahibawo ra gyud sila kay naay Facebook page ang eskuylahan hain sila nagtungha nga mopahibawo kanila kung unsang adlawa ug petsa mahatag ang allowance.
Isip kabahin sa orientation, gipakita sa CCCSP ang audio-visual presentation sa kagamhanan kabahin sa gilantaw ni Mayor Mike Rama nga mahisusama sa Singapore ang dakbayan.
Gikuhaan sa Cebu City News sa ilang panahom kabahin niini ang pipila nga mga iskolar nga nitambong sa orientation.
“Ang basic magsugod man gyud sa balay. Di man gyud kinahanglan mo-contribute ka’g dako siguro. Basic nalang—mag-segregate sa basura, kana sa plastic ug sa kanang malata ug di malata. Unya…kanang simpleng pag-attend lang sa ing-ani or kanang sa traffic rules imong sundon,” ingon ni Cathlene Joy Parba, 21, taga-barangay Tisa.
“Gamay ra gyud kaayo na pero in the long run dako na ‘na og contribution sa Cebu City,” dugang ni Parba, nga third year na sa kursong Interior Design Technology.
“Mo-cooperate lang gyud sa atong komunidad para hapsay, para naay nindot nga resulta sa atong pinalanggang Cebu City,” sulti sab ni James Aile Mark Albatera, 19, taga-barangay Talamban ug first year sa kursong Bachelor of Science Industrial Engineering.
Sa iyang bahin, niingon si Micah Gelig, 19, taga-barangay Labangon ug first year sa kursong Bachelor Early Childhood Education, nga ang pagtinarong niya og eskuyla usa na ka tampo alang sa gidamgo ni Mayor Rama.
“Makahuman og eskuyla, makatrabaho og tarong as educator man…. Magamit ni ang akong kurso puhon sa pag-educate sa mga bata. Mao niy akong matampo sa siyudad, ang pagtudlo og ang disiplina,” ingon niya.
“I will do my duties as a student kay as a student of a government school I have my responsibilities sab. Mao nay matampo nako, dapat moeskuyla ko’g tarong. Once in a blue moon ra raba gyud nga makadawat ta’g scholarship diri sa siyudad,” ingon sab ni Irene Nalzaro, 19, taga-barangay Labangon, first year sa kursong Bachelor of Elementary Education. #
Cebu City • News & Information 