Ni Rey Pasaporte
PIO Reporter
CEBU CITY (Oktubre 4, 2022) — Giawhag ni Konsehal Dondon Hontiveros ang mga Cebu City scholars nga mosuporta sa awhag ni Mayor Mike Rama nga disiplina pinaagi sa pagsunod niini sa ilang tagsa-tagsa ka mga panimalay.
Sa iyang pagpamulong kagahapon atubangan sa mga iskolar sa kagamhanan sa dakbayan sa Cebu Eastern College, gisulti sa konsehal nga paluyohan ang executive order ni Mayor Rama kabahin sa “Oplan Disiplina”.
Ang Oplan Disiplina kabahin sa katuyoan sa kagamhanan nga kab-oton ang damgo nga mahisusama ang dakbahan sa Singapore. Kini nagmando sa istriktong pagpatuman sa mga balaod batok sa pagpangluwa, pagpanigarilyo, paghugawhugaw, pagpangihi sa pangpublikong lugar, ug uban pang mga kalapasan.
Ang gisulti ni Konsehal Hontiveros subay sab sa iyang katungdanan isip labaw sa committee on scholarship program ug sa committee on education, science and technology sa Konseho sa Dakbayan.
Gipakita niya sa mga iskolar ang pinirmahang kopya sa EO sa mayor atol sa iyang pakigpulong.
Sumala pa niya, ang kagamhanan dili mangayo og permanenteng grado sa usa ka iskolar apan gihangyo sila nga motabang sa pagsabwag sa Oplan Disiplina, bisan anha lang sa tagsa-tagsa ka panimalay panimalay.
Sa pagdumala sa Cebu City Scholarship Program (CCSP), gipaubos sa dakbayan sa orientation kabahin sa programa ang mga nahimong iskolar sugod kagahapong adlawa.
Nagkanayon si Judy Navarette, executive director sa CCSP, nga ang giuna nila mao ang mga nag-eskuyla dinhi nga tunghaan.
Kapin sa 5,000 ka mga tinun-an ang iskolar sa kagamhanan sa dakbayan karon nga nagtungha sa nagkalainlaing unibersidad ug pangpubliko nga mga college.
“Every first semester maghatag man ‘ta og orientation program sa mga new Cebu City scholar unya mao… toy first nga orientation sa mga scholars nato,” sulti ni Navarette.
Ang orientation pagahimoon sa nagkalainlaing mg eskuylahan kada adlaw hangtud sa Oktubre 11. #
Cebu City • News & Information 