Ni Rey Pasaporte
PIO Reporter

KALUNASAN, Cebu City (Oktubre 3, 2022) — Nagtinabangay niadtong Sabado sa buntag ang mga kawani sa City Hall kauban ang mga volunteer sa nagkalain-laing grupo o sektor sa paghawan ug paglimpyo sa kanhi Cebu City Zoo nga nahimutang dinhi.

Lemuel Felisario. (PIO/Rey Pasaporte)

Niingon si Lemuel Felisario, operations head sa Cebu City Hall Satellite Center nga ubos sa buhatan sa Barangay Affairs Office (BAO), nga himoon na nga “Cebu City Wild Life Protection and Rescue Resources Facility” ang pangalan sa dapit sa higayon nga ablihan na kini pagbalik.

“Since we have this volume of people coming over volunteers, public and private sectors, makita nato diha nga atong gisiguro ma-clear gyud ang main pathways unya para makahawan sila atong mga tawo nanilhig,” sulti niya.

Giklaro ni Felisario sa kadako sa dapit dili dali ang pagpahiuli niini apan ang laraw mao nga ang kadtong mga mananap nga samdan o nasakit  anhi na unya sila dad-on ug ibutang alang sa dugang pag-atiman o sa pagpaalim.

Taudtaod sab nga wala na naatiman ang kanhi Cebu City Zoo, nga gilaraw nga himuong siyang paalimanan sa mga mananap nga nasamad o nasakit. (PIO/Rey Pasaporte)

“Wala pa ta kaayo gyud naka-concept nga zoo ni.  We might consider other places, ngadto sa mountain barangays, posible nga adto gyud didto (ang zoo),” ingon niya.

“Here, right now it becomes a nursery, or it could become a sanctuary para sa atong mga gi-rescue nato nga mga mananap,” dugang niya.

Here, right now it becomes a nursery, or it could become a sanctuary para sa atong mga gi-rescue nato nga mga mananap.

Lemuel Felisario.

Sukad gipasirad-an ang kanhi Cebu Cebu Zoo niadtong tuig 2016 panahon sa pagdumala sa laing administrasyon, naa gihapoy nahabilin nga duha ka klase sa mananap. Sagad hinuon sa mga mananap nangabalhin na sa laing lugar. #