Ni Russel Fullozos 
PIO Reporter

CEBU CITY (Sept. 29, 2022) — Sayon na lang unya ang pag-ila kinsay tag-iya kung pananglitan nakagawas ug nawala ang inyong binuhi nga iro o kaha iring.

Kini kay pwede na silang butangan og radio frequency identification (RFID) nga microchip tag nga mohatag og signal nga mahimong masubay ug impormasyon kabahin sa mananap kung-iscan ang tag.

Pulong ni Dr. Clyde Vincent Ederango sa Mandaue City Veterinary Division nga matag microchip adunay pinalahi nga numero nga gipanag-iya lang sa usa ka mananap ug nga ang impormasyon mabasa bisan haing bahina sa kalibotan.

Usa ka “one-stop-shop veterinary service” ang nahitabo kaganihang adlawan sa Robinson’s Galleria isip pagsaulog sa “World Rabies Day”. (PIO/Allan Cuizon)

Kini nagpasabot nga magamit sab kini kung mobayahe bisan asa, apil na sa gawas sa nasud. Lakip unya sa impormasyon nga makuha kung i-scan ang microchip mao ang datos kung kanus-a nabakunahan ug napurga ang mananap.

“You can travel anywhere in the world nga no need na ang mga clearance. Just a simple scanner makita na dayon. Kung kawaton (ang mananap) pwede pud ma-scan kay toa man ang pangalan sa tagi-ya,” pulong ni Dr. Clude Vincent Ederango.

Ang pagbakuna sa mga iro ug iring batok sa rabies maoy nag-unang serbisyo nga dalit sa Department of Veterinary Medicine and Fisheries sa pagsaulog niini sa “World Rabies Day”. (PIO/Allan Defensor)

Didto siya sa Robinsons Galleria karong adlawa kay niduyog sa gipahigayong libre nga pagpangkapon ug pag-ligate sa mga binuhing mananap nga dalit sa Cebu City Department of Veterinary Medicine and Fisheries (DVMF) isip pagsaulog sa “World Rabies Day”.

“Mao na nga awareness atong gihimo, about responsible pet ownership, kay sa tuig 2030, (target) zero rabies na ‘ta,” pulong ni Dr. Jessica Maribojoc, labaw sa DVMF. # 

Kamputhaw dogs get anti-rabies vaccine